नेपाली कांग्रेसका सभापति शेरबहादुर देउवाले आफूले प्रधानमन्त्रीको दाबी नगरेको बताएका छन्।
शनिबार बिपी स्मृति सामुदायिक सहकारी अस्पतालको १३ औं वार्षिक साधारण सभालाई सम्बोधन गर्दै सभापति देउवाले विपक्षी दलको नेता भावी प्रधानमन्त्री भए पनि आफू प्रधानमन्त्रीको लागि तयार नभएको बताए।
महाधिवेशन नजिकिएको भन्दै उनले पार्टीलाई एकताबद्ध बनाएर लैजानुपर्ने आवश्यकता रहेको बताए। ‘म प्रधानमन्त्रीको लागि तयार भएको होइन तर विपक्षी दलको नेता भनेको वेटिङ प्राइममिनिस्टर हो। विपक्षी दलको नेता भनेकै अल्टरनेटिभ प्राइमिनिस्टर हो। मैले प्राइममिनिस्टर खान्छु भनेकै छैन। अहिले पार्टीलाई एक गर्दै लानुपर्ने आवश्यकता छ। महाधिवेशन आइसकेको छ,’ उनले भने।
वरिष्ठ नेता रामचन्द्र पौडेलले नेपाली कांग्रेसको पहिलो प्राथमिकता संसदको अवरोध हटाउने भएको बताए।
संसदीय प्रणालीको संरक्षक आफूहरू भएको र संसदीय प्रणालीमा आउनु अवरोध आफूहरूको असफलता हुने भन्दै पौडेलले कांग्रेसले अरु आंकाक्षा नराखी संसदको अवरोधलाई हटाउने कुरामा मात्रै केन्द्रित हुनुपर्ने बताए।
संसदीय व्यवस्थालाई क्षति पुर्याउने काम आफूहरूले गर्नुनहुने उनको भनाइ छ। ‘संसदीय प्रणालीको संरक्षक हामी नै हौँ। संसदीय प्रणालीमा कुनै अवरोध आयो भने त्यो असफलता हाम्रो असफलता हो। त्यसकारण त्यो कुरा बुझेर हामीले संसदीय प्रणालीको डेडलकलाई हटाउने मात्रै कुरामा आफूलाई केन्द्रीत गरौं,’ उनले भने।
नेपाली कांग्रेसका केन्द्रीय सदस्य शेखर कोइरालाले नेपाली कांग्रेसले आगामी निर्वाचनको नेतृत्व गर्ने गरी अगाडि बढ्नुपर्ने धारणा राखे। नेकपा हालसम्म विभाजन नभएको भन्दै नेकपा विभाजन नभई कुनै कदम चालिए अप्ठ्यारो परिस्थिति सिर्जना हुनेतर्फ उनले सचेत गराए।
‘नेकपा आजको दिनसम्म विभाजन भएको छैन। नेकपा विभाजन नभई कुनै पनि कदम चाल्दाखेरी त्यसले भोलि अप्ठ्यारो परिस्थिति सिर्जना गर्छ कि भन्ने मलाइ चिन्ता छ। त्यो नहोस्। र, मेरो चाहाना चाहिँ के हो भने दुई वर्षपछि त निर्वाचन हुने नै छ,’ उनले भने।