प्रतिनिधिसभाका सभामुख अग्निप्रसाद सापकोटाले प्रतिनिधिसभाको बैठक व्यवस्थित ढंगले सञ्चालन गर्नेबारे राजनीतिक दलका नेताहरूसँग परामर्श गर्ने बताएका छन्।
मंगलबार संघीय संसद भवन नयाँबानेश्वरस्थित संसद बैठक कक्षको अवलोकनपछि सञ्चारकर्मीलाई संक्षिप्त प्रतिक्रिया दिँदै उनले भोलि बुधबारदेखि नै दलका नेताहरूसँग छलफल सुरू गर्ने बताएका हुन्।
संसद बैठकका एजेण्डाहरूको सम्बन्धमा सम्बद्ध सबै पक्षसँग तालिकाबद्ध रूपमा विचार, विमर्श र परामर्श गर्ने स्पष्ट पारे।
प्रतिनिधिसभा विघटन गर्ने सरकारको निर्णयलाई सर्वोच्च अदालतले बदर गरेपछि आगामी २३ गते बस्ने प्रतिनिधिसभाको बैठकलाई चासोका साथ हेरिएको छ।
सत्तारूढ दलभित्र देखिएको आन्तरिक किचलोका कारण बैठक सञ्चालन कुन ढंगले अघि बढ्ने हो भन्ने सर्वत्र चासो भइरहेका बेला सभामुख सापकोटाले बैठकका एजेण्डाबारे दलहरूसँग छलफल गर्ने बताए।
उनले बैठक सञ्चालनको तयारी चुस्तदुरुस्त भएको पनि बताए।
उनले भने, ‘स्वभाविक लयमै अधिवेशन चलाउनुपर्छ भन्ने ढंगले हामी तयारी गर्दैछौं। अहिले महासचिवदेखि सचिवालयका सचिवहरू, सबै कर्मचारीहरू पनि बडो उत्साहका रूपमा खटिराख्नुभएको छ। किनभने केही समय अवरूद्ध हुँदा कताकता खल्लो खल्लो भएको थियो अहिले सबै उत्साहित हुनुुहुन्छ। संसद बैठकका एजेण्डाहरूको सम्बन्धमा सबै पक्षसँग, पार्टीका नेताहरूसँग, कार्यव्यवस्था परामर्श समिति पनि छ, सबैसँग विचार, विमर्श, परामर्श गर्दैछु भोलिदेखि तालिकाबद्ध रूपमा।’
संसदको सातौं अधिवेशन फागुन २३ गते अपरान्ह ४ बजेको लागि आह्वान भएको छ।
बैठकको लागि संघीय संसद सचिवालयले सरसफाइ, व्यवस्थापनलगायत तयारीका काम गरिरहेको छ।