नेपाली कांग्रेसले डिलासैनी घटनामा संलग्नलाई पक्राउ गरी कारबाही गर्न माग गरेको छ।
मंगलबार बैतडीको डिलासैनीमा कांग्रेसको कार्यक्रममा प्रधानमन्त्री केपी शर्मा ओली निकट नेकपाबाट नियोजित रूपमा आक्रमण भएको भन्दै कांग्रेसले दोषीलाई कारबाही गर्न माग गरेको छ।
घटनापछि कांग्रेस प्रवक्ता विश्वप्रकाश शर्माले विज्ञप्ति जारी गर्दै यो आक्रमण निन्दनीय भएको बताएको छ।
सो कार्यक्रममा ढुंगामुढा हुँदा कांग्रेसका केन्द्रीय सदस्य एनपी साउदसहित तीन जना घाइते भएका थिए। केही सवारीसाधनमा तोडफोड गरिएको थियो।
यस घटनालाई कांग्रेसले केन्द्रीय नेतृत्वकै अभिव्यक्ति शैली र व्यवहारले नेकपाको स्थानीय पार्टी पंक्तिमा भूमिका खेलेको कांग्रेसको ठहर छ।
'सत्तारूढ नेकपाको स्थानीय पार्टी पंक्तिमा उग्रवादी चरित्र भर्न केन्द्रीय नेतृत्वकै अभिव्यक्ति शैली र व्यवहारले भूमिका खेलेको हाम्रो ठहर छ। यस्तो प्रवृत्ति परित्याग गर्न चेतावनी दिँदै नेपाली कांग्रेस डिलासैनी घटनाका दोषीहरूलाई तत्काल पक्राउ गरेर कारबाही गर्न माग गर्दछ,'विज्ञप्तिमा भनिएको छ।
नेकपा ओली समूहका स्थानीय कार्यकर्ता मुकेश पालको नेतृत्वमा आएको टोलीले ढुंगा प्रहार गरेको कांग्रेसको आरोप छ।
साउदका स्वकीय सचिव दीपक जोशीले सेतोपाटीलाई दिएको जानकारीअनुसार ढुंगा प्रहारबाट साउदको खुट्टामा चोट लागेको छ।
गाउँपालिकाको केन्द्रको विषयमा विवाद हुँदा नेकपा ओली र कांग्रेस कार्यकर्ताबीच ढुंगा हानाहान भएको हो।
