ओली नेतृत्वको नेकपाको राष्ट्रिय युवासँघको पुनर्गठनप्रति गृहमन्त्री रामबहादुर थापा बादल समूहका युवाहरुले असहमति जनाएका छन्।
राष्ट्रिय युवा संघका संयोजक रामप्रसाद सापकोटा 'दिपशिखा' प्रचण्ड-नेपाल समूहमा लागेपछि ओली समूहले सोमबार केन्द्रीय भेला गरेको थियो।
भेलाले वचनबहादुर सिंहलाई अध्यक्ष, किरण पौडेललाई सहअध्यक्ष र रमेश आचार्यलाई महासचिव चयन गरेको छ।
बादल समूहका युवा नेता बिरु तामाङले युवा संघको पुनर्गठनमा आफूहरूको सहमति नरहेको बताए।
'उहाँहरूले एकताको भावनाविपरीत आफ्नै तरिकाले राष्ट्रिय युवा संघको पुनर्गठन गर्नुभएको छ। गुटको भेला गरेर कुटपिट गरी जबरजस्ती नेतृत्व चयन भएको छ,' तामाङले भने,'युवा संघको नेतृत्व चयनबारे पार्टीमा छलफल चलिरहेको थियो तर जन वर्गीय संगठन मोर्चाका इन्चार्जलाई समेत थाहा नदिइकन गरिएको भेला अवैधानिक हो। यो खारेज हुनुपर्छ।'
जवस मोर्चाका इन्चार्ज समेत रहेका उर्जामन्त्री टोपबहादुर रायमाझीलाई जानकारी नगराइकान भेला गरिएको तामाङले बताए।
विधानमा संयोजक र सहसंयोजक रहने व्यवस्था भएको भए पनि विधानविपरीत अध्यक्ष, उपाध्यक्ष, महासचिव, सचिवलगायत चयन भएको उनको आरोप छ।
ओली पक्षीय युवा संघका महासचिव रमेश आचार्यले बाहिर आएजस्तो विवाद नभएको दाबी गरे।
'उहाँहरूले आफ्नो बलियो उपस्थिति खोजेको हुनसक्छ। हामीले उहाँहरूसँग नियमित छलफल गरिरहेका छौं,' आचार्यले भने,'उहाँहरूको समेत सहमतिमा हामीले भेला गरेको हो। सबैलाई समेटेर लैजाने गरी हामीले प्रयास गरिरहेका छौं।'
