चालू आर्थिक वर्षका लागि विनियोजित बजेटको झण्डै ८० प्रतिशत विकास बजेट खर्च गर्न बाँकी रहँदा भरतपुर महानगरपालिकाले पुरक बजेट ल्याएको छ। गत असार १० गते छैटौं नगरसभागरी महानगरले आर्थिक वर्ष २०७७/०७८ का लागि ४ अर्ब १५ करोड ६४ लाख रुपैयाँको बजेट कार्यान्वयनमा ल्याएको थियो।
करिब ६ महिनामै सातौं नगरसभा गर्दै भरतपुर महानगरपालिकाले ५६ करोड ४२ लाख २५ हजार रुपैयाँको पुरक बजेट ल्याएको हो। नगरसभाको विषयमा जानकारी दिन मंगलबार गरिएको पत्रकार सम्मेलनमा बोल्दै मेयर रेणु दाहालले जनताबाट थप विकासका कामका लागि चर्को दवाव आएपछि पुरक बजेट ल्याउनुपरेको बताइन्।
‘चालू आर्थिक वर्षको लागि विनियोजन ऐनले चालू आर्थिक वर्षका लागि विभिन्न बजेट खर्च शीर्षक तथा उप-शीर्षकअन्तर्गत खर्च गर्न दिएको अख्तियारी रकम अपर्याप्त भएको र नयाँ कार्यक्रम थप गर्नु परेकाले पुरक बजेट ल्याएका हौं,’ दाहालले भनिन्, ‘पुरक बजेटको मध्यमबाट जनअपेक्षालाई सम्बोधन गर्न सहयोग पुग्नेछ।’
अख्तियारी नदिएको नयाँ सेवामा खर्च गर्न आवश्यक भएको भन्दै महानगरले सञ्चित कोषमा मौज्दात रहेको पुरै बजेटलाई पुरक बजेटका रुपमा ल्याएको हो।
महानगरका प्रमुख प्रशासकीय अधिकृत प्रेमराज जोशीकाअनुसार चालू आर्थिक वर्षमा महानगरको चालूतर्फ २७.६८ प्रतिशत र पुँजीगततर्फ २१.१५ प्रतिशत बजेट मात्र खर्च भएको छ।
महानगरले चालूतर्फ एक अर्ब ८७ करोड ६६ लाख ८ हजार र पुँजीगततर्फ दुई अअर्ब २७ करोड ९८ लाख ८० हजार ४ सय रुपैयाँ बजेट विनियोजन गरेको थियो।
पुरक बजेटको साढे तीन करोड रुपैयाँ चालू खर्चमा र बाँकी पूर्वाधार विकास, शिक्षा र वातावरण तथा विपद व्यवस्थापनमा खर्च गरिने जोशीले बताए।
पुरक बजेटबाट सबै भन्दा धेरै रकम १३ करोड रुपैयाँ सामपूरक साझेदारी कोषमा र ९ करोड रुपैयाँ विशेष आकस्मिक कोषमा राखिएको छ। सोही बजेटबाट ४ करोड रुपैयाँ निर्माणाधीन गौतमबुद्ध अन्तर्राष्ट्रिय क्रिकेट रंगशालालाई दिने तय भएको मेयर दाहालले बताइन्।
बाँकी बजेट कल्भर्ट निर्माण, सडक कालापत्रे तथा ग्राभेल, वडा कार्यालय निर्माण, मर्मत देखि मठमन्दिर निर्माणसम्मका लागि छुट्टाइएको छ।
महानगरले यस वर्ष ९० करोड रुपैयाँ राजश्व संकलन गर्ने लक्ष्य राखेकोमा पुस २३ गतेसम्ममा २२ करोड २७ लाख ९९ हजार रुपैयाँ संकलन गरेको जनाएको छ। यो रकम गत वर्ष यही अवधिमा संकलित राजश्व भन्दा १४ करोड रुपैयाँले कम हो।
