नेकपा मसालका महामन्त्री मोहन विक्रम सिंहले सत्तारूढ नेपाल कम्युनिष्ट पार्टी (नेकपा) फुटको असर नेकपालाई मात्रै नभएर सिंगो देशलाई पर्ने टिप्पणी गरेका छन्।
शुक्रबार राजधानीमा आयोजित एक कार्यक्रममा बोल्दै महामन्त्री सिंहले नेकपालाई फूटबाट बचाउन आफूहरूले धेरै पहल र जोड दिएको भए पनि उक्त प्रयास सफल हुन नसकेको बताए।
काठमाडौंमा भएको एक कार्यक्रममा महामन्त्री सिंहले नेकपा फूटको पछाडि राजनीतिक वा संवैधानिक कारण नभएर नेताहरुबीचको अन्तरकलह नै मुख्य कारण रहेको दाबी गरे। ‘नेकपाको यो फूट अराजनीतिक प्रकारको छ, यसले देशलाई दीर्घकालिन असर पारेको छ, यसको पहिलो परिणाम संसद विघटन भयो । कोरोनाले मुलुकलाई दीर्घकालिन असर पारेको बेला र राष्ट्रियतामाथि गम्भीर संकट आएको बेला, नेकपा फुट्नु दुःखद् छ,’ उनले भने।
उनले पछिल्लो समय राजावादीहरु पनि सलबलाएको र उनीहरुको चलखेल शुरु भएकाले गणतन्त्र/धर्मनिरपेक्षता र संघीयता पक्षधर शक्तिहरुबीच बलियो एकता आवश्यक रहेको बताए। उनले नेकपा फूटको प्रमुख कारण वर्तमान प्रधानमन्त्री केपी शर्मा ओली नै भएको पनि दाबी गरे। उनले ओलीले विधि र प्रक्रियालाई आत्मसात् नगरेको गुनासो पोखे। उनले पार्टीभित्र विधि र प्रक्रिया हुने र बहुमत र अल्पमत पनि ओलीले नअपनाएको आरोप लगाए।
नेपालमा धेरै अन्तरकलह र राजनीतिक अस्थिरता सिर्जना गर्न विदेशी शक्तिहरु उद्धत रहेको महासचिव सिंहको दाबी छ। ‘जसरी भारतीय गुप्तचर संस्था रअका प्रमुख गोयलले नेपालमा रहस्यमयी भ्रमण गरे, यो आपत्तिजनक छ । भारत नेपाललाई हिन्दूराष्ट्र बनाउन चाहन्छ । राजसंस्था ल्याउच चाहन्छ् । अमेरिकाको पनि आफ्नै स्वार्थ छ । अमेरिकी सहयोग सम्झौता एमसीसी ईण्डो–प्यासिफिक स्ट्राटेजीअन्तर्गत नै हो । ओली सरकारले एमसीसी पारित गर्न पूरा प्रयत्न गरेको थियो । नेकपा फुटपछि चीनको पनि भूमिका बढेको छ । चिनियाँ उच्चस्तरीय प्रतिनिधिमण्डलले नेपाल भ्रमण गरेर फर्किएको छ,’ उनले भने।
उनले नेपालमा अहिले भैरहेको राजावादीहरुको आन्दोलनमा बाहृय शक्तिको हात रहेको आरोप लगाए। उनले भने, ‘राजावादीहरु आफ्नो शक्तिमा सडकमा आएका होइनन्। यसमा भारतको हात छ । भारतीय सत्तारूढ शक्ति नेपाललाई हिन्दूराष्ट्र बनाएर आफ्नो देशमा पनि प्रभाव पार्न चाहन्छ।’
उनले नेपालमा जतिपनि संकट आएका छन्, ती सबै संकटलाई आफूहरुले पार लगाएको पनि विश्वास दिलाए। उनले भने,‘अहिलेको स्थितिलाई पनि हामीले सामना गरेर यो स्थितिबाट मुलुकलाई पार लगाउँछौं।’
प्रधानमन्त्री ओलीले असंवैधानिक कदम चालेका कारण आफ्नो पार्टीले सरकारलाई दिएको समर्थनसमेत फिर्ता लिएको उनले स्पष्ट पारे। र, सरकारविरुद्ध आन्दोलनसमेत शुरु गरिएको उनले बताए। ‘हाम्रो शक्ति सानो छ, तर विचार र नीति भने स्पष्ट छ । सरकारविरुद्ध शुरु गरिएका आन्दोलनमा हाम्रो साथ र समर्थन छ । प्रचण्ड पक्ष, नागरिक समाजले शुरु गरेका आन्दोलनमा हाम्रो समर्थन हुन्छ,’ उनले भने।
उनले ओली सरकार जनताको शक्तिको अघि धेरै दिन नटिक्ने दाबीसमेत गरे। ‘ओली सरकार जनताको शक्तिसामू पराजित हुनेछ । प्रतिगमनकारी शक्ति अवश्य पराजित हुन्छन्,’ उनले भने। उनले नेकपालाई आफूहरुले कम्युनिष्ट पार्टी नै नमानेको पनि स्पष्ट पारे।
उनले आफूलाई काम गर्न दिइएन भन्ने प्रधानमन्त्री ओलीको दाबीमा कुनै सत्यता नभएको जिकीर गरे। उनले भने,‘ओलीको कदम असंवैधानिक छ । ओली सरकारले काम गर्न नसक्नुको कारण उसको नीति नै गलत छ । उसको कार्यनीति नै प्रष्ट छैन्।’ मुलुकमा चलेको अहिलेको प्रतिगमनको हावाको पछाडि ओली नै मुख्य दोषी रहेको पनि उनको गम्भीर आरोप छ ।
