भारतीय विदेश सचिव हर्षवर्द्धन श्रींगला दुई दिने भ्रमणका लागि बिहीबार बिहान काठमाडौं आइपुगेका छन्।
चार्टर्ड जहाजमा बिहान ११ बजेतिर त्रिभुवन विमानस्थलमा उत्रिएका श्रींगलालाई परराष्ट्र सचिव भरतराज पौडेलले स्वागत गरेका थिए।
विमानस्थलमा पत्रकारहरूसँग प्रतिक्रिया दिँदै श्रींगलाले आफू पहिला नै नेपाल आउन चाहेको भए पनि कोरोनाभाइरसका कारण सम्भव नभएको र अहिले नेपाल आउन पाएकोमा निकै खुसी भएको बताए।
विमानस्थलमा श्रींगलाले नेपालीमै बोलेका थिए। उनले पहिला पनि आफू काठमाडौं आएको र विदेश सचिवका रूपमा भने पहिलो पटक नेपाल आएको बताए।
उनले नेपाल-भारत सम्बन्ध निकै बलियो भएको कुरामा पनि जोड दिए।
‘हाम्रो सम्बन्ध निकै मजबुद् छ। हाम्रा प्रयासले हाम्रो सम्बन्धलाई अझ कसरी अगाडि लैजान्छौं भन्ने देखाउनेछन्। मलाई देखाउनुभएको न्यानो सत्कारका लागि नेपाल र सरकार र परराष्ट्र सचिवलाई धन्यवाद,’ उनले भने,‘हामी केही महत्वपूर्ण बैठकमा बस्दैछौं। हेरौं तिनले कस्तो काम गर्छन्।’
श्रींगलाका बुवाआमा सिक्किमका हुन्। उनीहरू दार्जिलिङमा बस्थे। श्रींगलाकी आमा हरिदेवी बस्नेत हुन्। उनका बुवा टी छिरिङ्ला वैदेशिक व्यापार केन्द्रमा प्रमुख उपनियन्त्रक थिए। उनीहरू घरमा नेपाली बोल्थे।
श्रींगलाको जन्म भने मुम्बईमा भएको थियो। जागिरका शिलशिलामा उनका बुवा विभिन्न ठाउँमा गइरहन्थे।
आमाबुवाले दुबै जनाको नाम र थर बनाएर सन्तानको नाम राखेका थिए। आमा हिन्दु भएकाले उनको नाम हर्षवर्द्धन भयो भने बाबुको बाट छिरिङ्ला थर बनाइयो।
त्यतिबेला मुम्बईमा छिरिङ्ला थर अनौठो थियो। त्यसैले विद्यालयका शिक्षकले उनको थर बिगारेर श्रींगला बनाइदिए। श्रींगला र छिरिङ्ला उस्ताउस्तै सुनिने भएकाले उनीहरू झुक्किएका हुन सक्छन्।
झुक्किएर डकुमेन्टमा लेखिएको थर नै पछि उनले प्रयोग गर्ने भए। १९८४ मा श्रींगला भारतीय विदेश सेवामा भर्ना भए।
विदेशस्थित नियोगहरूमा कूटनीतिज्ञ बनेर जाँदा उनी कुन समुदायका हुन् भनेर चासोको विषय हुन्थ्यो।
