कोरोना भाइरसको जोखिम न्यूनीकरणका लागि स्थानीय प्रशासनले रुपन्देहीमा कडाई गर्ने भएको छ।
स्वास्थ्यकर्मी, व्यापारी, राजनीतिक कार्यकर्ता लगायतलाई कोरोना संक्रमण देखिएपछि जिल्लास्तरीय कोभिड–१९ संकट व्यवस्थापन केन्द्र डिसिसिएमसीले जिल्लामा कडाई गर्ने निर्णय गरेको हो।
डिसिसिएमसिको आइतबार बसेको बैठकले कोरोना नियन्त्रणका लागि हालसम्म गरेका कामहरुको समीक्षा गर्दै आगामी दिनमा संक्रमण फैलिन नदिन दिउँसोको समयमा मात्र पसल व्यवसाय संचालन गर्न दिने निर्णय गरेको छ।
डिसिसिएमसिको यो निर्णय सँगै अब बिहान ११ बजेदेखि साँझ ७ बजेसम्म मात्र व्यवसाय तथा पसलहरु सञ्चालन गर्न पाइनेछ।
त्यस्तै हाल भईरहेका क्वारेन्टिनहरु पनि बन्द हुँदै गरेकोले हरेक पालिकाले अनिवार्य रुपमा एउटा क्वारेन्टिन बनाउनुपर्ने भएको छ ।
त्यस्तै जिल्लाका साप्ताहिक रूपमा संचालन भएका हाटबजारमा मानिसहरुको भिड बढ्न थालेको भन्दै हाटबजार सञ्चालन नगर्न स्थानीय पालिकाहरुलाई आग्रह गरेको छ ।
यस्तै भारतमा संक्रमण दर तीव्र गतिमा बढिरहेको र रुपन्देहीमा पनि संक्रमणको जोखिममा रहेकोले भारतसँग सीमा जोडिएको बेलहिया नाका बाहेकका सबै नाकाहरुबाट आवतजावतमा रोक लगाउने निर्णय गरेको छ।
केन्द्रका संयोजक एवं रुपन्देहीका प्रमुख जिल्ला अधिकारी महादेव पन्थले चाडपर्व नजिक आईरहेकोले भोजभतेर गरी भीड बढाउने कार्य नगर्न पनि आग्रह गरेका छन्।
