काठमाडौंको सीतापाइलामा गत साता एसिड आक्रमणमा परेकी ओखलढुंगाकी पवित्रा कार्कीको उच्च शिक्षामा नेपाल विद्यार्थी संघले सघाउने भएको छ।
एसिड आक्रमणमा परेकी कार्कीको कीर्तिपुर अस्पतालमा उपचार भइरहेको छ।
बिहीबार कार्कीलाई भेटेर नेविसंघका अध्यक्ष राजीव ढुंगाना सहितको केन्द्रीय पदाधिकारी टोलीले कार्कीको शिक्षामा सघाउने बताएका हुन्।
कार्की कक्षा १२ उत्तिर्ण छिन्।
‘नेविसंघ केन्द्रीय समितिले कार्की जीको शिक्षाको सम्पूर्ण जिम्मेवारी लिएको हो,’ नेविसंघ महामन्त्री उर्मिला थपलियाले सेतोपाटीसँग भनिन्, ‘उहाँले के पढ्न चाहनुहुन्छ, त्यहीअनुसार सबै व्यवस्था मिलाउने जिम्मा नेविसंघले लिएको हो।’
कार्कीले न्याय प्राप्तिका लागि आवश्यक पर्ने सहयोग गर्न पनि नेविसंघ तयार रहेको उनले जानकारी दिइन्। नेविसंघले उच्च शिक्षामा सघाउने घोषणा गरेकोमा कार्कीले खुसी व्यक्त गरेकी थिइन्।
परिवारसँग छलफलपछि उनको शिक्षाको जिम्मेवारी नेविसंघले लिएको उनले बताइन्।
गत बिहीबार साँझ सीतापाइलामा कार्कीमाथि एसिड आक्रमण भएको थियो।
उक्त घटनामा संलग्न दुई जनालाई प्रहरीले नियन्त्रणमा लिएर आवश्यक कारबाही अगाडि बढाएको छ।
