दिउँसो पक्राउ परेका ‘इनफ इज इनफ’ अभियानका पाँच जना अभियन्ताहरू रिहा भएका छन्।
अभियन्ताहरु पुकार बम, प्रमेश श्रेष्ठ, समुन्द्र केसी, पवन मल्ल र सुजन थापा दिउँसो सिंहदरवार दक्षिण गेटबाट पक्राउ परेका थिए।
उनीहरुलाई साँझ छाडिएको हो। रिहाईपछि अभियन्ता पुकार बमले सडकबाट उठाएर सडकमै ल्याएर सरकारले छोडेको भन्दै आक्रोश व्यक्त गरे।
ती अभियन्ताको मागप्रति ऐक्वबद्धता जनाएको विवेकशील नेपालीका अध्यक्ष मिलन पाण्डेले पक्राउप्रति भत्सर्ना गरेका छन्।
सरकारले अपहरण शैलीमा उनीहरुलाई उठाएर सडकमा घिसारेर फालिएको भन्दै पाण्डेले भत्सर्ना गरे। ‘गृहमन्त्रीले तत्काल उत्तर दिनुपर्छ, यी युवा साथीहरूसङ्ग माफी माग्नुपर्छ’ उनले भने।
महानगरीय प्रहरी वृत्त सिंहदरबारका डिएसपी हरिबहादुर बस्नेतले भने उनीहरू निषेधित क्षेत्रमा भेला भई भित्र प्रवेश गर्न खोजेपछि पक्राउ गरेको बताएका छन्। पक्राउपछि उनीहरुलाई पुलिस क्लवमा राखिएको थियो।
