सर्वोच्च अदालतले न्यायालयमा विचाराधीन मुद्दामा प्रभाव पार्ने गरी समाचार नगर्न अनुरोध गरेको छ। सर्वोच्च अदालतलका प्रवक्ता भद्रकाली पोखरेलले सोमबार जारी गरेको विज्ञप्तिमा विचाराधीन मुद्दामा प्रभाव पर्ने गरी टिकाटिप्पणी र समाचार नगर्न अनुरोध गरिएको हो।
'न्याय सम्पादनका क्रममा हुन सक्ने त्रुटि सच्याउने कार्य निर्धारित विधि र प्रक्रियाअनुरूप अदालतबाटै हुने मान्यतालाई संवैधानिक कानुनी र न्यायिक अभ्यासको माध्यमबाट स्थापित गरिएको व्यहोरा विदितै छ,' सर्वोच्चको विज्ञप्तिमा भनिएको छ, 'अदालतमा विचाराधीन रहेका मुद्दाको काम-कारबाही र न्याय सम्पादनमा प्रभाव पर्ने गरी समाचारको प्रवाह वा टिकाटिप्पणी नगर्न सम्बद्ध सबैमा अनुरोध छ।'
सर्वोच्च अदालतबाट भएका काम-कारबाहीबारे केही दिनदेखि प्रवाह भइरहेका समाचार, टिकाटिप्पणी र गतिविधिमा ध्यानाकर्षण भएको पनि सर्वोच्चले जनाएको छ।
खासगरी बुढानिलकण्ठ 'हिट एन्ड रन' मुद्दामा अभियुक्तलाई धरौटीमा छाड्ने र श्रीमतीको हत्या कसुरमा सजाय काटिरहेका रञ्जन कोइरालालाई सजाय घटाउने सर्वोच्चको निर्णय पछिल्लो समय विवादित बनेको छ। यसलाई लिएर न्यायिक कार्यसम्पादनमाथि टिकाटिप्पणी भइरहेका छन्।
अदालतबाट भएका फैसला र आदेश सार्वजनिक स्वामित्वका विषय भएकाले स्वच्छ टिप्पणी, आलोचना र प्राज्ञिक बहस हुन सक्ने भए पनि ती निश्चित सीमा र मापदण्डभित्र रहेर गरे अदालतले सधैं सकारात्मक रूपमा लिने विज्ञप्तिमा उल्लेख छ।
न्यायपालिका आमनागरिकको आस्था, विश्वास र भरोसाबाट जीवन्त रहने संस्था भएकाले यसका काम-कारबाहीमा भ्रम सिर्जना हुने गरी टिकाटिप्पणी गर्दा यसको मर्यादामा आँच आउन सक्छ भन्नेमा सबैको ध्यान जान जरूरी भएको विज्ञप्तिमा उल्लेख छ।
