सेतोपाटी ब्रिफिङ
सत्तारुढ नेकपाभित्रको विवाद गहिँरिदै जाँदा अध्यक्ष पुष्पकमल दाहाल (प्रचण्ड) र वरिष्ठ नेता माधव नेपाल समूह केन्द्रीय कमिटी बैठकबाटै प्रधानमन्त्रीको राजीनामा टुंगो लगाउने रणनीतिमा अघि बढेका छन्।
बिहीबार बिहान प्रचण्ड निवास खुमलटारमा बसेको प्रचण्ड-नेपाल खेमाका शिर्ष नेताको भेलाले स्थायी समिति बैठक टुंग्याएर अब केन्द्रीय कमिटी बैठक बोलाउनु पर्ने निष्कर्ष निकालेका थिए।
खुमलटारमा नेकपा सचिवालयका नौमध्ये छ जनाको सहभागिता थियो। प्रचण्ड-नेपालका अलवा त्यहाँ उपस्थित झलनाथ खनाल, वामदेव गौतम, नारायणकाजी श्रेष्ठ र गृहमन्त्री रामबहादुर थापा पनि प्रधानमन्त्री केपी शर्मा ओलीले आफ्नो पदबाट राजीनामा दिनुपर्ने पक्षमा छन्।
स्थायी समितिले राजीनामाको निर्णय गरे पनि त्यसलाई अन्तत: केन्द्रीय कमिटीमा लगेर अनुमोदन गराउनु पर्नेछ।
'त्योभन्दा सिधै केन्द्रीय कमिटीले नै निर्णय गरौं भन्ने हाम्रो सोचाइ हो,' प्रचण्ड-नेपाल निकट एक नेताले भने।
खुमलटारमा बिहीबार बिहान भएको भेलाले नै प्रधानमन्त्री ओलीसँग कुरा गर्न आजै प्रचण्ड र नेपाल दुवै जाने निर्णय पनि गरेको थियो।
प्रधानमन्त्री ओलीलाई बालुवाटारमा भेटेर दुवै नेताले राजीनामा दिन सुझाव दिएका थिए।
'प्रधानमन्त्रीलाई प्रचण्ड र नेपाल दुवै नेताले राजीनामा दिन भन्नुभएको हो। प्रधानमन्त्रीले राजनीतिक, कूटनीतिक रूपमा एकपछि अर्को गल्ती गरेको भन्दै उहाँहरूले राजीनामा दिन सुझाव दिनुभएको हो,' प्रचण्ड-नेपाल निकट एक नेताले भने।
प्रधानमन्त्री ओलीले भने आफूले राजीनामा नदिने पूर्ववत अडान दोहोर्याए। आफूलाई हटाउने भए महाधिवेशन र संसदबाट त्यस्तो प्रयास गर्न चुनौती पनि दिए।
'अध्यक्ष फेर्ने हो भने तपाईंहरू महाधिवेशनबाट आउनुस्। महाधिवेशबाट निर्वाचित अध्यक्षलाई महाधिवेशनले नै फेर्ने हो,' प्रधानमन्त्रीका प्रेस सल्लाहकार थापाले उनको भनाइ उद्धृत गर्दै भने, 'प्रधानमन्त्री फेर्न संसदीय दल र संसदबाट संविधान बमोजिम विधि पुर्याएर आउनुस्।'
त्यसपछि अहिलेको विवादबारे छलफल गर्न केन्द्रीय कमिटी बैठक बोलाउनु पर्ने माग प्रचण्ड र नेपालले गरे। प्रधानमन्त्री ओली स्थायी समिति बैठक भोलि टुंग्याएर केन्द्रीय कमिटी बैठक बोलाउन सहमत भए।
त्यही सहमतिअनुसार एक साताका लागि सारिएको स्थायी समिति बैठक शुक्रबार बिहान ११ बजे बस्ने भएको छ। सो बैठकले केन्द्रीय कमिटी बैठक बोलाउने निर्णय गर्नेछ। केन्द्रीय कमिटी बैठक कहिले बस्ने भन्ने टुंगो नलागे पनि भदौ पहिलो सातासम्म बस्न सक्ने एक नेताले बताए।
शुक्रबारको स्थायी समिति बैठकले केन्द्रीय कमिटी बैठकको मिति तोक्ने सम्भावना रहेको स्थायी समिति सदस्य मणि थापाले सेतोपाटीलाई बताए।
'आज तीन जना नेताका बीचमा अहिले उठेका विषयवस्तुलाई केन्द्रीय कमिटीबाट टुंगो लगाउने गरी सहमति भएको मैले जानकारी पाएको छु। शुक्रबारको बैठकमा बाढीपहिरो, कोरोना महामारी लगायत विषयमा छलफल हुन्छ होला,' उनले भने, 'केन्द्रीय कमिटीका साथीहरूले पनि बैठक माग गर्नुभएको छ। सहज वातावरण बनेपछि कमिटी बैठक बस्नेगरी स्थायी समिति बैठक सकिन्छ होला।'
बालुवाटारमा प्रधानमन्त्री र प्रचण्ड-नेपालको बैठक सकिएपछि दुवै समूहले आ-आफ्ना गुटको भेला गरेर भोलिको रणनीतिबारे छलफल गरेका थिए।
प्रधानमन्त्री ओलीले बालुवाटारमै आफूनजिकका दुई सचिवालय र स्थायी समिति सदस्यसँग छलफल गरेका थिए भने प्रचण्ड-नेपाल खेमाले पनि खुमलटारमा आफ्ना पक्षका स्थायी समिति सदस्यसँग छलफल गरेका थिए।
बालुवाटारमा प्रधानमन्त्री ओली खेमाको छलफलमा कतिपय नेताले अहिले नै केन्द्रीय कमिटी बैठक बोलाउन नहुने तर्क गरेका थिए। सो छलफलका कारण अब केन्द्रीय कमिटी बैठक नै नबोलाउने निष्कर्षमा प्रधानमन्त्री ओली पुग्न सक्ने प्रचण्ड-नेपाल निकट एक नेताले गरे।
'उहाँहरूले भोलिको स्थायी समिति बैठक पनि नराखौं भन्ने बेर छैन,' ती नेताले भने।
नेकपा संसदीय दलका उपनेता एवम् स्थायी समिति सदस्य सुवास नेम्वाङले भने सेतोपाटीसँग कुरा गर्दै शुक्रबारका लागि तोकिएको स्थायी समिति बैठक अगाडि दुई अध्यक्षबीच भेट हुने बताए।
'अहिलेसम्म कुरा मिल्न सकेको छैन। शुक्रबार अध्यक्षहरू बस्नुहुन्छ,' उनले भने, 'दुई अध्यक्षको बैठकले स्थायी समिति बस्ने-नबस्ने समेत तय गर्छ।'
बालुवाटार छलफलमा उपप्रधानमन्त्री ईश्वर पोखरेल, महासचिव विष्णु पौडेल र स्थायी समिति सदस्य सुवास नेम्वाङ लगायत सहभागी थिए।
बालुवाटारलाई पनि शुक्रबार स्थायी समिति बैठक राखियो भने सहमतिविपरीत त्यही बैठकबाट प्रचण्ड-नेपालले प्रधानमन्त्रीविरूद्ध निर्णय गराउन सक्ने आशंका छ। वा केन्द्रीय कमिटीबाट त्यस्तो निर्णय आउने आशंका छ। त्यसैले पनि प्रधानमन्त्रीनिकट कतिपय नेताले उनलाई सहमति नहुन्जेल कुनै पनि कमिटी बैठक राख्न नहुने सुझाव दिएका छन्।
प्रचण्ड निवास खुमलटारमा बिहीबार साँझ भएको बैठकमा झलनाथ खनाल, माधव नेपाल, उपाध्यक्ष वामदेव गौतम, प्रवक्ता नारायणकाजी श्रेष्ठसहित स्थायी समिति सदस्य भीम रावल, अष्टलक्ष्मी शाक्य, रघुजी पन्त, गोकर्ण विष्ट, वेदुराम भुसाल, मातृका यादव, जनार्दन शर्मा र पम्फा भुसाल लगायत थिए।
उक्त भेलाले पनि केन्द्रीय कमिटी बैठक बोलाउनुपर्ने र त्यहीँबाट निर्णय गर्नुपर्ने निष्कर्ष निकालेको थियो।