पार्टीभित्र देखिएको विवाद वार्ताको माध्यमबाटै टुंगो लगाउन माग राख्दै नेकपाका केन्द्रीय सदस्यहरुले पार्टी कार्यालय धुम्बाराहीमा धर्ना दिएका छन्।
पार्टीभित्र पछिल्लो समय देखिएको विवादको हल वार्ता र सम्वादको माध्यमबाट नै निकाल्नुपर्ने माग राख्दै नेताहरु धर्नामा बसेका हुन्।
पार्टी विधि, विधान र पद्धति अनुसार चल्न नसके समस्या आउने भएकाले सबैले विधि पद्धति अनुसार अगाडि बढ्नुपर्ने उनीहरुको माग छ।
नेकपा केन्द्रीय सदस्य विजय पौडेलले नेताहरुले पार्टीको बैठकबाटै समाधान निकाल्नुपर्ने बताएका छन्।
बैठक बाहिरबाट समाधान नहुने उल्लेख गर्दै उनले सामुहिक छलफलबाट नै निष्कर्ष निस्किने बताए। नीतिलाई प्राथमिकतामा राखेर अगाडि बढेमा समस्या समाधान हुने उनको भनाइ छ।
अर्का केन्द्रीय सदस्य रामकुमारी झाँक्रीले पार्टीमा विधि र विधानभन्दा व्यक्ति प्रधानभएर अगाडि बढ्दा यस्तो समस्या आएको बताइन्।
व्यक्तिगत स्वार्थ र स्वेच्छाचारी ढंगले नेताहरु अगाडि नबढेको भए यस्तो सममस्या नआउने उनको भनाइ छ। विधि, विधान र पार्टीको बैठकबाट नै अहिलेको समस्याको समाधान खोज्नुपर्नेमा उनले जोड दिइन्।
अर्का सदस्य जगन्नाथ खतिवडाले पार्टी विभाजन गर्ने तत्वहरु सल्बलाउन लागे उनीहरु एक्लो पर्ने बताए। पार्टी विभाजनको सोच राख्नेहरुले सपना देखेपनि एक्लै हुने जिकिर गर्दै उनले पार्टी पंक्तिलाई कुनै क्षति नपुग्ने बताए।
उनले कार्यकर्ताहरुलाई नडराएर पार्टी एकताको पक्षमा वकालत गर्न आग्रह गरे। सबै समस्याको समाधान सम्वाद र विधानको पालना गरेर निस्किने उनको भनाइ छ।
पछिल्लो समय नेकपामा प्रधानमन्त्री केपी शर्मा ओलीको राजीनामा माग्ने पक्ष बलियो हुँदै गएको छ। स्व. मदन भण्डारीको जन्म जयन्तीका अवसरमा पार्टीका अध्यक्ष समेत रहेका ओलीले भारतले सरकार ढाल्न खोजेको र नेपालका नेताहरु समेत त्यसमा सक्रिय रहेको अभिव्यक्ति दिएपछि पार्टीभित्र विवाद बढेको हो।
स्थायी समिति बैठकमा ओलीको राजीनामा माग्ने पक्षको आवाज बलियो हुँदै गएपछि ओलीले बैठक छल्दै आएका छन्।
सरकारले अचानक संसद बैठक अन्त्य गर्ने निर्णय गरेपछि पार्टी फुटाउने अध्यादेश फेरि आउने आशंका नेकपा नेताहरुले गरिरहेका छन्।
दुई अध्यक्षबीचमा छलफलका लागि भन्दै नेकपाको स्थायी समिति बैठक शनिबारसम्मका लागि स्थगित भएको छ।
