आर्थिक मसान्त बित्नै लाग्दा रौतहटको कतिपय स्थानीय तहले नगरसभा गर्न सकेका छैनन्।
रौतहटको बौधीमाई नगरपालिका, देवाहीगोनाही नगरपालिका, कटहरिया नगरपालिकालगायत स्थानीय तहले कर्मचारी अभाव, नगरसभा गर्नका लागि आवश्यक पर्ने बहुमत नपुगेको कारणले असार मसान्त सकिन लाग्दा समेत बजेट निकासा गर्न सकेका छैनन्।
बहुमत नपुगेकै कारण अहिलेसम्म आफूहरूले नगरसभा गर्न नसकेको देवाही गोनाही नगरपालिकाका प्रमुख धमेन्द्रकुमार पटेलको भनाइ छ।
‘हाम्रो पक्षमा जम्मा ३ जना वडाध्यक्ष छन्, उपप्रमुखको पक्षमा ४ जना छन्, कार्यपालिकामा समेत हाम्रो बहुमत छैन, कसैले मेरो वडामा बजेट कम हुने भयो कसैले अर्को वडामा बजेट बढी गयो भनेर भन्नु हुन्छ,’ उनले भने, ‘यी सब खिचातानीकै कारण अहिलेसम्म हाम्रो पालिकाको नगरसभा अन्यौलमा छ।’
यी सब समस्या छिट्टै समाधान गरी आगामी २/३ दिनमै बैठक बसी नगरसभाको मिति तय गरिने नगरप्रमुख पटेलको भनाइ छ।
उनका अनुसार त्यहाँ कुनै प्रकारको कर्मचारीको अभाव छैन।
उक्त नगरपालिकामा जम्मा ९ वटा वडा रहेका छन्।
कर्मचारी अभावकै कारण अहिलेसम्म नगरसभा हुन नसकेको बौधीमाई नगरपालिकाका नगरप्रमुख राजीवरंजन यादव बताउँछन्।
‘हाम्रो नपामा लगभग १५ देखि २० वटा कर्मचारीको दरबन्दी रहेको छ,केन्द्रले छिट्टै पठाउँछौं भनेर जवाफ दिन्छ अहिलेसम्म पठाएको छैन’, प्रमुख यादवले भने, ‘आवश्यक कर्मचारी नभए कसलाई कुन काम अह्राउनु त? तत्कालका लागि हामीले अधिकृत नै पठाइदिनु भनेर आग्रह गरेका थियौं, हिजोदेखि रामेश्वरप्रसाद यादव ज्यू नयाँ अधिकृतको रूपमा हाजिर हुनुभएको छ, अब छिट्टै बैठक बोलाई नगरसभाका लागि तिथिमिति निष्कर्ष लगाउनेछौं।’
महामारीको रूपमा फैलिएको कोरोना भाइरसकै कारण आफूहरूले नगरसभा गर्न नसकेको गरुडा नगरपालिकाका नगरप्रमुख ईनु यादवले बताए।
‘कोरोना महामारी देशभरि तीव्र गतिमा फैलिँदै गएको थियो,त्यसमाथि रौतहटमा झन् यसले विकराल रूप लिँदै गयो त्यही डरले भीडभाड गर्न कसैले मान्नुभएन जसले गर्दा नगरसभा गर्न विलम्ब भयो,’ उनले भने, ‘विस्तारै परिस्थिति सामान्य हुँदैछ, हिजो हामीले वडाध्यक्ष सहितको बैठक बोलाएका थियौं जुन बैठकले असार २९ गते नगरसभा गर्ने निर्णय गरेको छ, यसका लागि हामीले तयारी थालिसकेका छौं।’
यसका अतिरिक्त राजदेवी, ईशानाथ नपामा समेत अहिलेसम्म नगरसभा हुन सकेको छैन।