राष्ट्रपति विद्यादेवी भण्डारी र प्रधानमन्त्री केपी शर्मा ओलीबीच मंगलबार बिहान भेटवार्ता भएको छ।
राष्ट्रपतिका स्वकीय सचिव भेषराज अधिकारीका अनुसार समसामयिक विषयमा छलफल गर्न प्रधानमन्त्री ओली बिहान शितल निवास पुगेका थिए।
‘साढे १० बजेदेखि उहाँहरूबीच छलफल भइरहेको छ। समसामयिक विषय कुरा गर्न भएको नियमित भेटघाट हो,’ उनले भने।
प्रधानमन्त्री निवास बालुवाटारमा सत्तारूढ नेपाल कम्युनिष्ट पार्टीको स्थायी समिति बैठक सुरू हुनु आधा घन्टाअघि प्रधानमन्त्रीओली राष्ट्रपति भण्डारीलाई भेट्न गएका हुन्।
पछिल्लो समय प्रधानमन्त्री ओलीले कालापानी क्षेत्र समेटेर नयाँ नक्सा जारी भएपछि भारतले आफूलाई हटाउन खोजेको अभिव्यक्ति दिएका थिए।
प्रधानमन्त्रीको उक्त अभिव्यक्तिको नेकपाभित्र विरोध भएको छ। नेताहरूले प्रधानमन्त्रीको भनाइबारे स्थायी समितिमा छलफल हुनुपर्ने बताएका छन्।
प्रधानमन्त्री ओली भने बालुवाटारमै भइरहेको पार्टी बैठक छलिरहेका छन्।
असार १० गते सुरू भएको बैठकमा आफ्ना भनाइ राखेका उनी अर्को बैठकमा सहभागी नै भएनन् भने १३ गते भएको बैठकमा केहीबेर बसेर निस्किए।