नेपाली कांग्रेसको भातृ संस्था नेपाल दलित संघलगायतले शनिबार माइतीघर मण्डलमा प्रदर्शन गरेका छन्।
पश्चिम रूकुमको चौरजहारी नगरपालिका वडा नम्बर ८ मा भएको घटनाको विरोधमा कांग्रेस पाठशालाको आयोजनामा नेविसंघ, नेपाल दलित संघ, दलित विद्यार्थी संघलगायतले संयुक्त रूपमा विरोध प्रदर्शन गरेका हुन्।
नेविसंघ महामन्त्री बलदेव तिमल्सिनाले क्रुर र अमानवीय तथा जघन्य अपराधका विरूद्ध माइतीघर मण्डलमा प्रदर्शन गरिएको बताए। हातमा ‘प्रेमको बदलामा नरसंहार?‘ लेखिएका प्लेकार्ड लिएर उनीहरूले प्रदर्शन गरेका हुन्।
उनीहरूले निस्पक्ष छानविनका लागि संसदीय छानविन समिति बनाउन पनि माग गरेका छन्। घटनाको विषयमा छानविन गर्न गृह मन्त्रालयले सहसचिवको नेतृत्वमा पाँच सदस्यीय छानविन समिति गठन गरेर उक्त समिति घटनास्थल पुगिसकेको छ।
गत शनिबार आफ्नी प्रेमिकाको घर गएका जाजरकोटका नवराज विकसहित पाँच जना युवाको मृत्यु भएको थियो। एक जना अझै वेपत्ता छन्। ती युवालाई गाउँलेहरूले आक्रमण गरेका थिए।
नेविसंघ महामन्त्री युवराज पाण्डेले घटनाको छानविन गरी दोषीमाथि कारवाही हुनुपर्ने बताए।