राष्ट्रिय जनता पार्टी (राजपा)ले आफ्ना मागहरुलाई समेत सम्बोधन गर्नेगरी संविधान संशोधन विधेयक दर्ता गर्न खोजिएको स्पष्ट पारेको छ।
यसअघि २०७४ सालमा तत्कालीन सरकारले संसदमा पेश गरेको संविधान संशोधन विधेयकलाई आफूहरुले दर्ता गर्न खोजेको राजपा महासचिव केशव झाले सेतोपाटीलाई बताए।
‘हामीले संविधान संशोधनको प्राइभेट बिल संसद सचिवालयमा दर्ता गर्न खोजेको हो तर दर्ता भएन। हामीलाई आइतबार बोलाइएको छ’ महासचिव झाले भने, ‘अहिले सरकारले दर्ता गरेको संविधान संशोधन विधेयकसँगै विगतको संशोधन विधेयकलाई पनि अगाडि बढाउनुपर्छ भन्ने हाम्रो माग हो।’
संविधान संशोधनका लागि प्याकेजमै सहमति खोज्नुपर्ने पक्षमा आफ्नो पार्टी रहेको उनले बताए। सरकारले भारतले अतिक्रमण गरेको नेपाली भूमि समेटेर सार्वजनिक गरेको नक्सालाई निसान छापमा राख्नका लागि संविधान संशोधन विधेयक संसदमा दर्ता गरेको छ।
यो विधेयकका पक्षमा रहने या विपक्षमा रहने भनेर राजपाले अहिलेसम्म आधिकारिक धारणा सार्वजनिक गरेको छैन। सरकारले ल्याएको संशोधन विधेयकसँगै आफूहरुले उठाएको संविधान संशोधनको एजेण्डालाई पनि सम्बोधन गर्नुपर्ने पक्षमा राजपा रहेको महासचिव झाले बताए।
यसअघि २०७४ सालमा तत्कालीन सरकारले लगेको संविधान संशोधन प्रस्तावको विपक्षमा एमालेले मतदान गरेपछि दोस्रो संशोधन प्रस्ताव असफल भएको थियो।
२०७४ भदौ ५ गते संविधान संशोधनलाई तत्कालीन संसदमा निर्णयार्थ पेश गरिएको थियो।
