कूल जनसंख्याको कम्तीमा दुई प्रतिशत जनतामा कोरोना परीक्षण गर्ने योजना छ : प्रधानमन्त्री

सेतोपाटी संवाददाता

काठमाडौं, जेठ १२

प्रधानमन्त्री केपी शर्मा ओलीले देशको कूल जनसंख्याको कम्तीमा दुई प्रतिशत जनतामा कोरोनाभाइरस परीक्षण गरिने बताएका छन्।

राष्ट्रका नाममा सोमबार अपरान्ह सम्बोधन गर्दै प्रधानमन्त्री ओलीले विज्ञका सल्लाहबमोजिम कम्तीमा जनसंख्याको दुई प्रतिशतमा परीक्षण विस्तार गरिने बताएका हुन्।

‘विज्ञका सल्लाहबमोजिम जनसंख्याको कम्तीमा दुई प्रतिशत जनतामा कोरोना परीक्षण गर्ने योजनामा सरकार छ,’ प्रधानमन्त्री ओलीले भने।

तथ्यांक विभागका अनुसार हाल नेपालको जनसंख्या २ करोड ९९ लाख ६६ हजार छ। यसको दुई प्रतिशत भनेको करिब ६ लाख हुन आउँछ। सरकारले हालसम्म ५१ हजार ६ सय ४२ जनामा पिसिआरबाट परीक्षण गरेको छ।

यसैगरी, प्रधानमन्त्री ओलीले २० भन्दा बढी प्रयोगशालाबाट परीक्षणको दायरा विस्तार गरिएको बताए।

प्रदेशस्तरमा पनि कोरोना परीक्षण विस्तार गरिएको र प्रयोगशाला स्थापना गरी सञ्चालनमा ल्याएको प्रधानमन्त्रीको भनाइ छ।

‘परीक्षण दायरा विस्तार गर्न किट र औषधि व्यवस्था गरिएको छ,’ उनले भने।

लकडाउनले जीवन असहज बनाए पनि कोरोनाका केस पहिचानमा मद्दत पुर्‍याएको उनले बताए।

प्रधानमन्त्रीले दुई महिनाका शिशुदेखि ८१ वर्षीया वृद्धाले कोरोना जितेकोमा उपलब्धि मान्नुपर्ने बताए।

प्रकाशित मिति: सोमबार, जेठ १२, २०७७ ०८:२५

सिफारिस