सत्तारूढ नेपाल कम्युनिष्ट पार्टी नेकपाको भातृ संगठन राष्ट्रिय युवा संघ नेपालले जाजरकोट जिल्ला संयोजक दिपेन्द्र शाहीलाई कारवाही गरेको छ।
नेकपा कर्णाली प्रदेश सदस्य एवं भेरी नगरपालिका प्रमुख चन्द्रप्रकाश घर्तीमाथि आक्रमण गरेको घटनामा स्पष्टिकरण सोधे पनि जवाफ नदिएपछि शाहीलाई संगठनबाट निकालिएको युवा संघले जनाएको छ।
युवा संघका संयोजक रामप्रसाद सापकोटा दिपशिखा र सहसंयोजक रमेश पौडेलले संयुक्त विज्ञप्ति निकालेर जिल्ला संयोजक शाहीलाई जेठ १० गतेदेखि लागू हुने गरी संगठनको साधारण सदस्यसमेत नरहने गरी कारवाही गरेको उल्लेख गरेका छन्।
घर्तीमाथि शाही नेतृत्वको समूहले वैशाख १३ गते भेरी नगरपालिका १० स्थित फेराघाटमा आक्रमण गरेको घटनामा छानविन गर्न पाँच सदस्यीय कार्यदल बनाएको र उक्त कार्यदलले शाहीमाथि पटकपटक स्पष्टिकरण सोधे पनि थाह नपाएझैं गरेकोले कारवाही गरिएको विज्ञप्तिमा उल्लेख छ।
गाउँमा विकासका योजना नदिएर पक्षपात गरेको भन्दै शाहीले घाटमा गएका बेला मेयर घर्तीमाथि आक्रमण गरेका थिए।