नेपाल विद्यार्थी संघले सञ्चारमन्त्री गोकुलप्रसाद बाँस्कोटालाई त्रिभुवन अन्तर्राष्ट्रिय विमानस्थलमा कालो झण्डा देखाएको छ।
धनगढीबाट काठमाडौं फर्कंदै गरेका मन्त्री बाँस्कोटालाई नेविसंघले त्रिभुवन विमानस्थलमै कालो झण्डा देखाएर विरोध गरेको हो।
नेविसंघ महामन्त्री दीपक भट्टराईले सञ्चारमन्त्री बाँस्कोटालाई कालो झण्डा देखाएको जानकारी दिए। भट्टराईका अनुसार कालो झन्डा देखाएको आरोपमा प्रहरीले नेविसंघ नेता विष्णुहरि खड्कालाई नियन्त्रणमा लिएको छ।
‘सञ्चारमन्त्रीले राजीनामा नदिएसम्म नेविसंघले विरोध जारी राख्छ,’ महामन्त्री भट्टराईले सेतोपाटीसँग भने।
यसअघि मन्त्री बाँस्कोटाको आवाजसहित कमिसन रकम मागेको दाबीसहित सेक्युरिटी प्रेस सम्बन्धी अडिओ रेकर्ड सार्वजनिक भएको थियो।