संस्कृति पर्यटन तथा नागरिक उड्डयनमन्त्री योगेश भट्टराईले नेपाल कोराेनामुक्त क्षेत्र भएको घोषणा गरेका छन्। नेपालमा एकजनालाई कोराेना लागेको पुष्टि भएपनि उनी अहिले मुक्त भएको र अर्को केस नदेखिएकाले नेपाल कोराेनामुक्त भएको उनको भनाइ छ।
नेपाल कोराेनामुक्त क्षेत्र हो भनेर विश्वभर यसको प्रचार गर्न उनले मातहतका निकायलाई निर्देशन पनि दिएका छन्।
मन्त्री भट्टराईले नेपाल कोराेनामुक्त क्षेत्र भएको बारे अन्तर्राष्ट्रिय सञ्चारमाध्यम, समाजिक सञ्जाल तथा फार्मट्रिपको माध्यमबाट संसारभर फैलाउन निर्देशन दिएका छन्।
यो काम पर्यटन बोर्ड,भिजिट नेपाल २०२० को सचिवालयलाई गर्न उनले निर्देशन दिएका हुन्।
अंग्रेजी तथा चिनियाँ भाषामा यस्तो खबर संसारभर फैलाउने र त्यसका लागि विदेशमा रहेका नेपाली कुटनीतिक नियोग र नेपालस्थित कुटनीतिक नियोगलाई प्रयोग गर्न उनले निर्देशन दिएका छन्।
अहिले चीनले कोराेनाको प्रकोपसँग भिडिरहेको र उसले सफलता पाउनेवित्तिकै नेपाल चिनियाँहरुलाई स्वागत गर्न तयार हरेको सन्देश चिनियाँ भाषामा सम्प्रेशन गर्नुपर्ने उनले निर्देशन दिएका छन्।
'छिमेकी मित्रराष्ट्र चीनले सामना गरिरहेको वर्तमान संकटप्रति नेपालको पूर्ण साथ,सहयोग तथा ऐक्यबद्धता रहेको छ। यस संकटलाई चीनले शिघ्र समाधान गर्ने र त्यसपछि चिनियाँ पर्यटकलाई स्वागत गर्न नेपाल तयार रहेको सन्देशमुलक श्रव्यदृष्य सामाग्री चिनियाँ भाषामा तयार गरी सातदिनभित्र चिनियाँ सञ्चारमाध्यमहरु तथा चीनमा रहेको नेपाली नियोग मार्फत् सम्प्रेषण गर्ने व्यवस्था मिलाउने' मन्त्री भट्टराईले दिएको निर्देशमा उल्लेख गरिएको छ।
