नेपाली कांग्रेसभित्र देखिएको विवाद समाधान गर्न उपसभापति विमलेन्द्र निधि, पूर्वमहामन्त्रीद्वय प्रकाशमान सिंह र कृष्णप्रसाद सिटौला सक्रिय भएका छन्।
पार्टी केन्द्रीय कार्यालय सानेपामा सोमबार निधि, सिंह र सिटौलाबीच विवाद हल गर्नेबारे छलफल भएको हो।
सभापति शेरबहादुर देउवा निकट केन्द्रीय सदस्यहरूमात्रै उपस्थित पुस ११ गतेको केन्द्रीय समिति बैठकले १४ औं महाधिवेशन ०७७ फागुन ७ देखि १० सम्म गर्ने, एक वर्ष कार्यकाल थप गर्ने, विधानका सदस्यतासम्बन्धी धारा निलम्बन गर्ने र २८ बाट बढाएर विभाग संख्या ४७ बनाउने निर्णय गरेपछि वरिष्ठ नेता रामचन्द्र पौडेल र सिटौला समूह रूष्ट थिए।
विवाद मिलाउन सभापति देउवाले पौडेल र सिटौलासँग कुराकानी गरिसकेका छन्।
सभापति देउवाले समाधान खोज्ने जिम्मेवारी उपसभापति निधिलाई दिएका छन्। निधिले पौडेल पक्षका सिंह र नेता सिटौलासँग छलफल गरी विवादको हल खोजेका हुन्।
‘उपसभापति निधि, पूर्वमहामन्त्रीद्वय सिंह र सिटौलाबीच छलफल भएको हो,’ सिंहका सहयोगी यूपी लामिछानेले भने।
छलफलमा सिंह र सिटौलाले पुस ११ गते बहुमतका बलमा गरिएका निर्णय विधानविपरीत रहेकाले सच्याउनुपर्ने अडान राखेका थिए।
उनीहरूले महाधिवेशन ०७७ मंसिरमै गर्न पनि अडान राखेका छन् भने सदस्यतासम्बन्धी धारा निलम्बन पनि फिर्ता गरिनुपर्ने माग राखेका छन्।
सभापति देउवाले तोकिएकै समयमा महाधिवेशन हुने दाबी गर्दै आएका छन्।
त्यसैले निधिले महाधिवेशन ०७७ फागुनमै गर्ने अडान दोहोर्याउँदै जिल्ला र पालिकास्तरका अधिवेशन कार्यतालिकाबारे हेरफेर हुनसक्ने संकेत गरेका हुन्।
विवाद समाधान गर्न नेताहरू पटक/पटक छलफलमा बसे पनि ठोस सहमति भने हुन सकेको छैन।