सत्तारूढ नेपाल कम्युनिष्ट पार्टी ‘नेकपा’का प्रवक्ता नारायणकाजी श्रेष्ठ हरेक महिनाजसो गृहजिल्ला गोरखा गइरहन्छन्।
श्रेष्ठ अगुवा कार्यकर्ता भेला तथा प्रशिक्षणका लागि बुधबार पनि गोरखामा छन्।
गोरखा पुगेका बेला उनले प्राय: पत्रकार भेटघाट गरिरहन्छन्।
बुधबार बिहान पनि जिल्लाका पत्रकारसँग उनले समसामयिक राजनीतिक घटनाक्रमबारे आफ्ना धारणा राखे।
पत्रकारहरूले प्रश्नको सुरूआत नजिकिएको राष्ट्रियसभा सदस्य निर्वाचन र त्यसमा श्रेष्ठको उम्मेदवारीबाट सुरू गरे।
पत्रकार: राष्ट्रियसभामा उम्मेदवारी अर्थमन्त्री बन्न हो भन्ने चर्चा छ नि!
प्रवक्ता श्रेष्ठ: मैले त्यस्तो चर्चा सुनेको छैन। अब अरूले सुनेको भए.. भन्ने पनि अरू सुन्ने पनि अरू भयो। राष्ट्रियसभा सदस्य निर्वाचन सकिएको छैन। सम्पन्न भएपछि मात्रै म संघीय संसदको सदस्य हुन्छु। सांसदको भूमिका निर्वाह गर्छु। त्यसक्रममा के जिम्मेवारी दिने त्यो पार्टीको कुरा हो। थप कुरा सोच्नु उपर्युक्त हुन्न।
पत्रकार: तपाईं पहिले पनि मन्त्री भएर काम गरिसकेको हो। सांसद मात्रै हुन त राष्ट्रियसभा सदस्य हुन लाग्नुभएको पक्कै होइन।
प्रवक्ता श्रेष्ठ: मैले सोचेर वा अध्यक्षद्वयसँग भनेर, समझदारीअनुसार उम्मेदवारी दिएको होइन। व्यक्तिगत चाहनालाई पनि उम्मेदवारी दिएको होइन। पार्टीले जे निर्णय गर्छ त्यो जिम्मेवारी पूरा गर्दै जान्छु।