इरानले गत हप्ता भूलवश आफ्नो मिसाइल लागेर खसालिएको युक्रेनी विमान खस्दै गरेको भिडिओ खिच्ने व्यक्तिलाई पक्राउ गरेको बताएको छ।
पक्राउ परेका व्यक्तले राष्ट्रिय सुरक्षासँग सम्बन्धित कानुनको सामना गर्नुपर्ने बताइन्छ।
गत बुधबार इरानले हानेको मिसाइल लागेर युक्रेनको जहाज खस्दा त्यसमा सवार सबै १७६ जनाको मृत्यु भएको थियो।
इरानले सो घटना भुलवश भएको र सोका लागि जिम्मेवार कयौं व्यक्तिहरुलाई पक्राउ गरिएको बताइसकेको छ।
राष्ट्रपति हसन रुहानीले सो मामिलाको अनुसन्धानलाई एक विशेष अदालतले हेर्ने बताएका छन्।
'यो नियमित र आम मुद्दा हुनेछैन। सारा संसारले यो अदालतलाई हेर्नेछ', एक सम्बोधनमा उनले भने।
त्यसैगरी रुहानीले यस दुखद् घटनामा व्यक्ति विशेषलाई मात्र दोष दिन नहुनेमा जोड दिएका छन्।
'यसमा ट्रिगर दबाउने मान्छेसँगै अरु सम्बन्धितहरु पनि जवाफदेही हुनुपर्नेछ', उनले भने।
इरानले सुरुमा आफ्नो मिसाइल लागेर विमान नखसेको दाबी गरेको भएपनि पछि स्वीकार गरेको थियो।
इरानले भिडिओ पोस्ट गर्ने व्यक्तिलाई पक्राउ गरेको बताएको भएपनि सो भिडिओ पोस्ट गर्ने इरानी पत्रकारले इरानी अधिकारीहरुले गलत व्यक्तिलाई समातेको र आफ्नो श्रोत सुरक्षित रहेको ट्वीट गरेका छन्।
