चिकित्सा शिक्षा आयोग उपाध्यक्ष डा. श्रीकृष्ण गिरीले दुर्गा प्रसाईंविरूद्ध मुद्दा दायर गरेका छन्।
प्रस्तावित बिएण्डसी मेडिकल कलेज सञ्चालक प्रसाईंविरूद्ध गिरीले मंगलबार काठमाडौं जिल्ला अदालतमा मुद्दा हालेका हुन्। गिरीले प्रसाईंविरूद्ध गालीबेइज्जती तथा मानहानिको मुद्दा दायर गरेका हुन्।
प्रसाईंले बिएन्डसी मेडिकल कलेजको सम्बन्धन निवेदन लिएर आयोग जाँदा गिरीले निवेदन दर्ता नगराई २० करोड रूपैयाँ घुस मागेको आरोप लगाएका थिए।
‘उहाँले झुठा तथा कपोलकल्पित आरोप लगाएर बेइज्जत गरेपछि मुद्दा दायर गरेको हुँ,’ गिरीले सेतोपाटीसँग भने। यससँगै प्रसाईं र गिरीबीच मुद्दा हालहालको स्थिति बनेको छ। प्रसाईंले सोमबार गिरीविरूद्ध अख्तियार दुरूपयोग अनुसन्धान आयोग र सम्पत्ति शुद्धीकरण अनुसन्धान विभागमा उजुरी दर्ता गराएका थिए।
घुस मागेको दोहोर्याउँदै प्रसाईंले मंगलबार पनि पत्रकार सम्मेलन गरेका थिए। प्रसाईंले गिरीसँग अदालतमै कानुनी लडाइँ हुने प्रतिक्रिया दिए। ‘मुद्दा हाल्नुभएछ, मलाई त अदालतमा गएर आफ्नो कुरा राख्ने मौका भयो, अदालतमै कानुनी लडाइँ हुन्छ,’ प्रसाईंले भने।
निवेदन लिएर जाँदा दर्ता नगराई गिरीले होटल द्वारिकाजमा बोलाएर बीस करोड रूपैयाँ वा कलेजको दस प्रतिशत सेयर मागेको आरोप प्रसाईंले लगाएका थिए। उक्त आरोप झुठो भएको गिरीले बताउँदै आए पनि उनले कानुनी रूपमा त्यसको प्रतिवाद गरेका थिएनन्।
मुद्दा दायरसँगै घुस मागेको प्रमाण खोज्न अदालतले सक्छ। अदालतले प्रमाण खोजे प्रहरीले अनुमति लिएर होटलको सिसिटिभी फुटेज निकाल्न सक्छ। अपराध अनुसन्धानका क्रममा अदालतले आदेश दिए जुनसुकै ठाउँबाट पनि प्रमाण जुटाउन प्रहरीले सक्ने एक अधिकारीले बताए।