गृहमन्त्री रामबहाादुर थापाले भारतले नेपालको कालापानीमा भारतले सुरक्षा विस्तार गरेको सूचना सरकारलाई प्राप्त भएको बताएका छन्।
प्रतिनिधि सभाको अन्तराष्ट्रिय सम्बन्ध समितिमा मन्त्री थापाले भारतले सीमा सुरक्षा बल (एसएसबी)सँगै गोर्खा राइफल्स (जिआर) समेत परिचालन गरेको बताए।
'भारतको तर्फबाट उनीहरुले आफ्नो उपस्थिति अझ विस्तार गरिराखेका छन्', थापाले संसदीय समितिमा भने, 'एसएसबी मात्र होइन उनीहरुले गोर्खा राइफल्स पनि त्यहाँ राखेका छन्। उनीहरुको सीमा सुरक्षा एसएसबीले हेर्ने भएपनि आर्मी नै त्यहाँ राखेका छन्। उनीहरुको त्यहाँ चार/पाँच हजारको संख्या छ।’
थापाले सरकारसँग भारतीय सुरक्षा तैनाथीबारे विस्तृत विवरण रहेको बताए। उनले भारतले आउटपोस्ट पनि राखेका कारण सरकारले काउन्टरमा पोस्ट राख्ने योजना बनाएको बताए।
दार्चुलामा ४ हजारको संख्यामा सशस्त्र प्रहरीको गुल्म रहेको उनीहरुलाई सात ठाउँमा खटाउन लागिएको मन्त्री थापाले उल्लेख गरे। उनले कालापानी क्षेत्रमा पुग्न नेपालको बाटो नभएकोले धेरै समस्या भएको बताए। उनले सरकारले सीमा सुरक्षा पोस्ट बढाउने र सशस्त्र प्रहरीको दरबन्दी वृद्धि गर्न लागेको उल्लेख गरे।