विगतका वर्षहरुमा सडक, सामाजिक भवन तथा क्षमता विकासका कार्यक्रममा खर्च हुँदै आएको रुपन्देही क्षेत्र नम्बर २ को स्थानीय पूर्वाधार विकास साझेदारी कार्यक्रम अन्तर्गत यस वर्षको सबै रकम शिक्षामा लगाइने भएको छ।
नेकपाका महासचिव तथा पुर्व अर्थमन्त्री समेत रहेका बिष्णु पौडेलको निर्वाचन क्षेत्र रहेको रुपन्देही क्षेत्र नम्बर २ को ६ करोड रुपैयाँ शतप्रतिशत शिक्षामा लगाइने भएको हो।
सांसद पौडेलको अध्यक्षतामा बसेको बैठकले क्षेत्र नम्बर २ मा रहेका १२ वटा सामुदायिक विद्यालयको भौतिक पूर्वाधार निर्माणमा रकम खर्च गर्ने निर्णय गरेको हो।
समितिमा संघीय समानुपातिक सांसद, राष्ट्रियसभा सदस्य, जिल्ला समन्वय समितिका प्रमुख र उपप्रमुख, क्षेत्रभित्र पर्ने पालिकाका प्रमुख÷अध्यक्ष सदस्य रहने व्यवस्था छ।
पौडेलले सडक नाली तथा सानातिना योजनामा रकम लगाउँदा दुरुपयोग हुने सम्भावना हुनुका साथै कतै पनि राम्रो काम नदेखिने भएकोले यसपटक सबै ६ करोड रुपैयाँ शिक्षाको विकासमा लगाउने निर्णय गरिएको जानकारी दिए।
निर्वाचन क्षेत्रभित्र रहेका विद्यालयलाई ३५ लाख देखि ६५ लाख रुपैयाँसम्म छुट्टाईएको छ। तिलोत्तमा ६ को गिर्वाण संस्कृति मावि, तिलोत्तमा २ को जनजागृति मावि, तिलोत्तमा ४ को जनज्योति मावि, बुटवल ११ को नविन औद्योगिक कदरबहादुर रीता मावि, बुटवल ७ को सिद्धेश्वर लालकुमारी माविलाई ५०–५० लाख विनियोजन गरिएको छ।
त्यस्तै बुटवल ११ को नहरपुर माविलाई ५० लाख, बुटवल १२ को सरस्वति माविलाई ५० लाख, बुटवल ८ स्थित जनता माविलाई ५० लाख र सैनामैना २ को कालिका तथा जनज्योति आधारभूत विद्यालयलाई ५० लाख छुट्टाईएको छ।
त्यसैगरी सैनामैना १ को पर्रोहा परमेश्वर आधारभूत विद्यालयलाई ३५ लाख र पर्रोहा माविलाई ६५ लाख गरी एकमुष्ट रुपमा ६ करोड रूपैयाँ विद्यालयलाई दिने निर्णय गरिएको हो।