नेपाली कांग्रेसका प्रवक्ता विश्वप्रकाश शर्माले सुनसरीको धरान उपमहानगरपालिकामा नेपाली कांग्रेसको नेतृत्वमा सबैको विजय भएको बताएका छन्।
सोमबार पार्टी केन्द्रीय कार्यालय सानेपामा उपनिर्वाचनका मतपरिणामको विश्लेषण सुनाउन आयोजित पत्रकार सम्मेलनमा शर्माले धरानमा सबैको जित भएको बताए।
धरानको मतपरिणामलाई कांग्रेसले कसरी लिएको छ? भन्ने प्रश्नमा शर्माले भने, ‘धरानमा विजय हासिल गर्दा केबल कांग्रेस उम्मेदवारले प्रशंसा लिनुपर्ने हामी भन्दैनौं। धरानमा कांग्रेस नेतृत्वमा सबैको विजय भएको छ।’
धरानमा कांग्रेसका तिलक राईले दुई हजार सात सय मतान्तरले नेपाल कम्युनिष्ट पार्टी नेकपाका उम्मेदवार प्रकाश राईलाई हराएका थिए।
तिलकले २६ हजार सात सय ९ मत ल्याएका थिए भने प्रकाशले २३ हजार ९ सय १४ मत ल्याएका थिए।
गत शनिबार त्यहाँ उपनिर्वाचन भएको थियो।
