कास्की-२ बाट प्रतिनिधिसभा सदस्यमा निर्वाचित विद्या भट्टराईले आफूलाई मतदान गरेर विजयी बनाएको भन्दै मतदातालाई धन्यवाद दिएकी छन्।
‘कास्की-२ का मतदाता जसले नेकपालाई विश्वास गर्नुभयो, अभिमत दिनुभयो, सबैप्रति हार्दिक आभार’, उनले भनिन्, ‘यो जित तपाईंहरू सबैको हो, म त एउटा पात्र मात्र हो।’
उनले चुनावी अभियानमा जनाएको सबै प्रतिवद्धता पूरा गर्ने दोहोर्याइन्।
‘यो क्षेत्रमा जनताका निर्माणका काम प्रतिवद्ध भएर पूरा गर्छौं’, उनले भनिन्, ‘पोखरालाई समृद्ध बनाउन केही पूर्वाधार बनाउन छ।’
उनले समृद्धिका लागि गुणस्तरीय स्वास्थ्य, आम्दानी बढाउने, गुणस्तरीय शिक्षा र सामाजिक न्याय आवश्यक पर्ने भन्दै यसैमा आफू लागिपर्ने बताइन्।
भट्टराईले सुकुम्बासी समस्या समाधान गर्न १ वर्षभित्र लालपुर्जा वितरण गर्ने समेत प्रविद्धता जनाइन्।
विजयीसभामा विद्याले उनका श्रीमान् रवीन्द्र अधिकारीप्रति श्रद्धा व्यक्त गरिन्।
‘समृद्धि नेपालका अभियन्ता रवीन्द्र अधिकारी, मेरो जीवन साथी सहयोद्धाप्रति हार्दिक सम्मान व्यक्त गर्न चाहन्छु’, उनले भनिन्, ‘हामीले पीडाका बाबजुद निर्वाचन सम्पन्न गरेका छौं, आरोह अवरोह तोड्दै जित हासिल गरका छौं।’
उनले प्रतिपक्षतर्फ इंगित गर्दै आफूहरू विरूद्ध लगाएका आरोप चिर्न सकेको बताइन्।
‘हामीलाई उत्तेजित बनाउन गरिएका हरेक खालका क्रियाकलाप तोड्दै अगाडि आएका छौं’, उनले भनिन्, ‘हामी जिम्मेवार भएर आएका छौं, किनकी यो मुलुक बनाउने जिम्मेवारी फेरि पनि यहाँका मतदाताले हामीलाई दिनुभएको छ।’
