राष्ट्रिय प्रजातन्त्र पार्टी नेपालका अध्यक्ष कमल थापाले आफूहरू हिडिँराखेको बाटो सजिलो नभएको बताएका छन्।
राप्रपा अरू दलभन्दा फरक विचार र बाटोबाट हिँडिराखेको बताउँदै उनले आफूहरूले अवलम्बन गरेको बाटो सही, उपयुक्त भए पनि कठीन रहेको बताए।
अमेरिकाको बाल्टिमोरमा राप्रपा निकट प्रवासी नेपाली एकता समाजको तेस्रो अधिवेशन उद्घाटन गर्दै थापाले भने, ‘कतिपयले दुस्साहसपूर्ण बाटो भनेतापनि नेपालको लागि राप्रपाले अबलम्बन गरेको बाटो सही, उपयुक्त तर कठिन छ।’
उनले राप्रपाको निष्ठा र आदर्शमा शंका नगर्न पनि आग्रह गरे। राष्ट्रियता, राष्ट्रिय एकता, सुशासन, विकासमा पार्टी र पार्टीभन्दा माथि उठेर विवेकको प्रयोग गर्ने अवस्था नरहेको भन्दै अध्यक्ष थापाले देशमा डरलाग्दो ठूला भ्रष्टाचारका काण्ड भइरहेको पनि बताए।
‘हरेक काण्डमा स्वतन्त्र र स्वाभिमानी जनताभन्दा पार्टीको कार्यकर्ता भएर निर्णय गर्दा र निर्वाचनमा मतदान गर्दा नागरिक आवाज कमजोर हुँदै गएको छ,’ उनले भने।
