नेपाल कम्युनिष्ट पार्टी (नेकपा) का अध्यक्ष पुष्पकमल दाहाल (प्रचण्ड) ले आफू छिट्टै चीन जाने बताएका छन्।
शुक्रबार काठमाडौंमा आयोजित कार्यक्रममा बोल्दै प्रचण्डले चिनियाँ राष्ट्रपति सी चिङफिङको नेपाल भ्रमणपछिको एक समझदारीअन्तर्गत आफ्नो नेतृत्वको टोली चीन जाने बताएका हुन्।
'राष्ट्रपति सी नेपाल आएपछि चीनको इतिहास तथा आन्दोलनबारे नेपालका पार्टीहरू र नेताहरूले त्यहाँको अध्ययन गर्ने र उहाँहरू पनि यहाँ आएर अध्ययन गर्ने एउटा समझदारी भएको थियो,' उनले भने, 'पहिलो टोली सायद छिट्टै चीन जाँदैछ। उहाँहरूले मेरै नेतृत्वमा आइदिओस् भनेर प्रधानमन्त्रीजी र मलाई पनि भन्नु भएको छ र म जाँदै पनि छु।'
प्रचण्डले चीनसँगको यस समझदारीले जनस्तरको सम्बन्ध विस्तार गर्ने कुरामा र जनमत निर्माण गर्ने कुरामा महत्वपूर्ण भूमिका खेल्ने विश्वास लिएको बताए।
उनले लिपुलेक, लिम्पियाधुरा वा कालापानीको कुरा गर्दा सुदृढ राष्ट्रिय एकता पाउने धारणा समेत राखे।
'यस पृष्ठभूमिले पनि हामीलाई एकै ठाउँमा उभिन निक्कै प्रेरित गरेको छ र आउने दिनमा हामीले यो स्पिरिटलाई कायम राख्न सके हाम्रो छिमेकीसँगको सम्बन्धलाई नेपालको विकासका निम्ति राम्रोसँग सदुपयोग गर्न सकिन्छ,' अध्यक्ष प्रचण्डले भने।
प्रचण्डले चीनसँग त्यस्तो केही समस्या नभएको बताउँदै एक चीन नीति र नेपाल नीतिमा केही दायाँबायाँ नहुने बताए।
'यो नै वास्तवमा नेपाल चीन सम्बन्धको एउटा ऐतिहासिकता, मौलिक विशेषता र गौरव गर्न लायक विशेषताका रूपमा रहेको छ,' उनले भने।