प्रतिबन्धित समूह नेत्रविक्रम चन्द (विप्लव) ले सरकारले इमानदारीका साथ पहल गरे वार्ताको लागि तयार रहेको बताएका छन्।
महासचिव ‘विप्लव’ले विज्ञप्तिमार्फत् वार्ताको लागि पक्राउ परेका नेता कार्यकर्ताको विनासर्त रिहा र प्रतिवन्ध हटाउनुपर्ने माग गरेका हुन्।
पश्चिम नेपालको अज्ञातस्थलमा भएको भनिएको केन्द्रीय समितिको आठौं बैठकपछि १२ बुँदे विज्ञप्ति जारी गर्दै उनले सो कुरा उल्लेख गरेका छन्।
‘सरकारले आफ्नो फासिवादी दमनलाई ढाकछोप गर्न ‘वार्ता’ को हतियार प्रयोग गरिरहेका सन्दर्भमा पार्टीले षड्यन्त्रपूर्ण वार्ताप्रचारलाई भण्डाफोर गर्ने तर इमानदारीका साथ आएर प्रतिबन्ध हटाएर गिरफ्तार कमरेडहरूलाई छोडेर निःसर्त आएमा सकारात्मक रूपले सोच्ने निर्णय लिएको छ,’ विप्लवले विज्ञप्तिमा भनेका छन्।
सरकारसँग वार्ताका लागि आफूमाथिको प्रतिबन्ध हटाउनुपर्ने र नेता–कार्यकर्तालाई निःसर्त रिहा गर्नुपर्ने माग गर्दै विप्लवले यसअघि सरकारले वार्ताको नाममा षडयन्त्र गर्न खोजेको हुँदा वार्ता हुन नसकेको संकेत गरेका छन्।
प्रहरीले असोज ३० गते दाङको राजपुर गाउँपालिका वडा नं. ४ बाट २१ जना विप्लवका कार्यकर्तालाई एकैपटक पक्राउ गरेको थियो।
