कैलालीको धनगढी उपमहानगरपालिका -३ चटकपुरस्थित निलम होटल अगाडि शक्तिशाली बम बिस्फोट भएको छ।
बिहीबार साँझ ७ बजेतिर भएको बिस्फोटमा परी पाँच जना घाइते भएका छन्।
घाइतेहरुको स्थानीय मेट्रो अस्पतालमा उपचार भइराखेको छ। घटनास्थलबाट चाइनिज पेस्तोल फेला परेको प्रहरी महानिरीक्षकको सचिवालयका प्रहरी उपरीक्षक रमेश थापाले सेतोपाटीलाई जानकारी दिए।
घटनामा निलम होटलका सञ्चालक केशवराज पाण्डे, जितेन्द्र यादव, राम सिंह, मोविन खान र लक्ष्मण सेरेला घाइते छन्। दुई जना घाइतेको अवस्था गम्भीर छ भने अरू तीन जना सामान्य घाइते छन्।
घटनास्थलमा अनुसन्धानका लागि एसपी सुदीप गिरीको टोली खटिएको छ। बम बिस्फोट कसले गराएको भन्ने खुलेको छैन। ‘सुरुमा सिलिण्डर ग्यास पड्केको भन्ने खबर प्रहरीलाई आएको थियो। घटनास्थलमा पुगेर हेर्दा बम नै रहेछ,’ थापाले भने, ‘घटनामा संलग्नको खोजी भइराखेको छ।’