पूर्वप्रधानमन्त्री माधवकुमार नेपालसहित संघीय सरकारका मन्त्रीहरू डुबान प्रभावित क्षेत्रको अनुगमन गरिरहेका छन्।
प्रदेश २ मा बाढी पहिरोले पुर्याएको क्षति, राहत र उद्धारको अवस्था बुझ्न पूर्वप्रधानमन्त्री नेपाल, उपप्रधान तथा स्वास्थ्यमन्त्री उपेन्द्र यादव, गृहमन्त्री रामबहादुर थापा (बादल), उर्जा तथा जलस्रोतमन्त्री वर्षमान पुन, यातायातमन्त्री रघुवीर महासेठ बिहान नेपाली सेनाको हेलिकप्टरबाट रौतहट पुगेका हुन्।
यस्तै, टोलीमा कृषि राज्यमन्त्री रामकुमारी चौधरी, संसदको विकास समितिका सभापति कल्याणी खड्का र रौतहटका सांसद प्रभु साह पनि सहभागी छन्।
रौतहटका बाढी प्रभावितहरूको अवस्था बुझेपछि टोलीले प्रदेश २ का अरु सात जिल्लाको पनि अनुगमन गर्ने गृहमन्त्री बादलका प्रेस संयोजक किरण भट्टराईले जानकारी दिए।
टोलीले बारा, पर्सा, सर्लाही, सिरहा, महोत्तरीलगायत जिल्लाको पनि अनुगमन गर्ने तयारी गरेको छ।
अघिल्लो साता परेको ठूलो वर्षाले प्रदेश २ मा ठूलो क्षति पुर्याएको छ।
हालसम्म देशभर बाढीपहिरो परी मृत्यु हुनेको संख्या ७८ पुगेको छ।