अमेरिकी राष्ट्रपति डोनाल्ड ट्रम्पले प्रतिपक्षी डेमोक्र्याटिक पार्टीका चार महिला सांसदविरूद्ध रूखो टिप्पणी गरेका छन्।
ती सांसदप्रति लक्षित गर्दै सामाजिक सञ्जाल ट्वीटरमा उनले लेखेका कुराको अहिले आलोचना भइरहेको छ।
सोमबार राष्ट्रपति ट्रम्पले श्रृंखलावद्ध ट्वीट गर्दै चार डेमोक्र्याटिक सांसदहरूलाई अमेरिका र इजरायलविरोधी कम्युनिष्टको संज्ञा दिएका थिए।
उनले भनेका थिए- हामी सबैलाई थाहा छ एलेक्जेन्ड्रिया अकासियो कोर्टेज र उनको भीड एक कम्युनिष्ट समूह हो। उनीहरू इजरायललाई घृणा गर्छन्, उनीहरू हाम्रो देशलाई पनि घृणा गर्छन्।
उनले ती आप्रवासी महिला सांसदहरूलाई अमेरिका मन नपर्ने भए जहाँबाट आएको हो त्यही फर्के हुने सुझाव दिएका छन्।
‘जहाँको सरकारले काम गर्न नसकेर व्यवस्था पूर्ण रूपमा ध्वस्त भएका मुलुकबाट आएका ती ‘प्रगतिशील’ महिलाहरू संसारकै महान् तथा शक्तिशाली मुलुक अमेरिकाको सरकार कसरी चल्नुपर्छ भनेर सुझाव दिइरहेका छन्। उनीहरू आफू जहाँबाट आएका हुन् त्यहीँको समस्या समाधान गर्न किन जाँदैनन्,’ ट्रम्पले लेखेका छन्,‘ यो अमेरिकालाई माया गर्ने विषय हो। केही मानिसहरू अमेरिकालाई घृणा गर्छन्। उनीहरू इजरायलविरोधी, अलकायदा समर्थक, ९/११ को घटनाले कसैले केही गर्यो भनेर प्रतिक्रिया दिन्छन्। हामी कहिल्यै पनि साम्यवादी र कम्युनिष्ट मुलुक हुँदैनौं। यदि तिमी यहाँ खुसी छैनौं भने तिमी जान सक्छौ। यो तिमीहरूको रोजाइ हो।’
उनले ती महिला सांसदहरूले माफी माग्नु पर्ने बताएका छन्।
‘आफूले प्रयोग गरेको भाषा र भनेका तुच्छ कुराका लागि यी महिला सांसदहरूले हाम्रो राष्ट्रसँग, इजरायलवासीसँग र राष्ट्रपति कार्यालयसँग पनि कहिले माफी माग्लान्? धेरै मानिस उनीहरू र उनीहरूको भयानक अनि घृणाजनक कामसँग रिसाएका छन्,’ ट्रम्पले ट्वीटरमा लेखेका छन्।
ट्रम्पले ती महिला सांसदहरूले सुरूदेखि नै आफूलाई महाअभियोग लगाएर डेमोक्य्राटिक पार्टीको अनुहार बन्न चाहेको पनि पनि दाबी गरेका छन्। उनले उनीहरूका नीतिले डेमोक्य्राटिक पार्टीमात्र होइन देशलाई नै खत्तम पार्ने पनि उल्लेख गरेका छन्।
ट्रम्पको ट्वीट कोर्टेजसहित कंग्रेस सदस्यहरू आयाना प्रेसिल्ला, इलान ओमार, रासिदा तलिबप्रति लक्षित थियो।
उनीहरूले ट्रम्पलाई जातिवादी भएको टिप्पणी गरेका थिए।
केही दिनअघि उनीहरू अमेरिकाको दक्षिण सीमामा रहेको हिरासत केन्द्रमा गएका थिए। त्यहाँका बन्दीले आफूहरूले ट्वाइलेटको पानी पिइरहेको सुनाएको भन्दै संसदीय समितिमा उनीहरूले ट्रम्पको नीतिको आलोचना गरेका थिए।
चार जनामध्ये ओमरबाहेक तीन जनाको अमेरिकामै जन्मेका हुन् भने ओमर १२ वर्षकी हुँदा सोमालियाबाट शरणार्थीका रूपमा अमेरिका आएका थिइन्।
ट्रम्पको अभिव्यक्तिप्रति विश्वका नेताहरूले पनि प्रतिक्रिया जनाएका छन्।
बेलायती प्रधानमन्त्री थेरेसा मेले ट्रम्पको अभिव्यक्ति अस्वीकार्य भएको बताएकी छन्।
न्युजिल्यान्डका प्रधानमन्त्री ज्यासिन्दा आर्डेनले ट्रम्पको अभिव्यक्तिमा आफू पूर्ण रूपमा असहमत रहेको बताएकी छन्।
ट्रम्पको ट्वीटबारे क्यानडाका प्रधानमन्त्रीले जस्टिन ट्रुडोले भनेका छन्-हामी क्यानडामा त्यस्तो गर्दैनौं, क्यानाडियन भनेको क्यानिडिन नै हुन्छन्।
