केही दिनयताको अविरल वर्षा र बाढीले प्रभावित परिवारको राहतको लागि प्रदेश नं. २ का राज्यमन्त्रीदेखि मुख्यमन्त्रीसम्मले एक महिनाको तलब दिने भएका छन्।
मन्त्रिपरिषदको आज बसेको बैठकले राहत, उद्धार तथा पुनर्स्थापनालाई तीव्र बनाउने निर्णय गर्दै एक महिना बराबरको तलब राहत कार्यका लागि दिने भएको हो।
यस्तै, मन्त्रिपरिषदले साउन १ गतेदेखि प्रदेशका सबै मन्त्री, राज्यमन्त्री र प्रदेशसभा सदस्यहरुलाई आ–आफनो क्षेत्रमा गई राहत कार्यमा जुट्न आग्रह गरेको छ ।
बाढीले प्रभावित परिवारहरूलाई राहत कार्यमा कुनै कमी हुन नदिन प्रदेशका प्रमुख सचिव दिपक सुवेदीको संयोजकत्वमा सबै मन्त्रालयका सचिव रहने गरी राहत आपूर्ति तथा अनुगमन समिति समेत गठन गरेको छ ।
उक्त समितिले राहतका लागि आवश्यक सामग्रीको आपूर्तिसहित अनुगमन र निरीक्षण समेत गर्नेछ।
प्रदेश सरकारले यसअघि राहत वितरणका लागि प्रत्येक जिल्लालाई पठाएको १० लाख रकमको अनुगमनसमेत सोही समितिले गर्नेछ।
प्रदेश सरकारले यसअघि नै बाढीबाट मृत्यु हुनेको परिवारलाई ३ लाख राहत उपलब्ध गराउने निर्णय गरिसकेको छ।