डोल्पामा एक सातायता बिरामीको संख्या बढेको छ।
टाइफाइड ज्वरोका बिरामी बढेपछि भुइँमै राखेर उपचार गर्नुपरेको स्वास्थ्यकर्मीले बताएका छन्।
‘अस्पतालका सबै शैय्या भरिए। भुइँमै राखेर बिरामीको उपचार गरिराखेका छौं,’ जिल्ला स्वास्थ्य प्रमुख रनलाल कुलालले सेतोपाटीसँग भने।
अस्पतालमा २५ जना बिरामी उपचाररत छन्। बिरामी बढेपछि शैय्यामात्र होइन, स्वास्थ्यकर्मी र औषधिको पनि अभाव झेल्नुपरेको कुलालले बताए। उनका अनुसार बिरामी हुनेको संख्या बढ्दो छ।
१५ शैय्या क्षमताको जिल्ला अस्पतालमा दस जना बढी राखेर उपचार भइराखेको छ। स्थानीय तहहरूसँग सहकार्य गरेर शैय्या थप गर्न लागिएको उनले बताए।
‘बिरामी बढ्दै गएपछि औषधि, स्वास्थ्यकर्मी र ठाउँको व्यवस्थापनका लागि प्रदेश सरकार र केन्द्रसँग सहयोग मागिरहेका छौं’, उनले भने।
रोग नियन्त्रण महाशाखा काठमाडौं, स्वास्थ्य निर्देशनालय र प्रदेशस्थित सामाजिक विकास मन्त्रालयसँग समन्वय गरी बिरामीको उपचारमा सहजता ल्याउन खोजिएको उनको भनाइ छ।
यहाँका पानीका मुहानमा कोलिफर्म भेटिएका कारण बिरामी बढेको उनले दाबी गरे।