अर्थमन्त्री युवराज खतिवडाले नेपाल नेपाल एयरलाइन्स सञ्चालनका लागि सरकारले ऋण खोजिरहेको बताएका छन्।
प्रधानमन्त्रीका तर्फबाट प्रतिनिधि सभामा पर्यटन मन्त्रालयको विषयमा उठेको प्रश्नमा जवाफ दिदैँ खतिवडाले सरकारले ऋण र व्यवसायिक साझेदार खोजिरहेको बताएका हुन्।
नेपाली कांग्रेस सांसद सञ्जय गौतमले नेपाल वायुसेवा निगम सेतो हात्ती बनेको टिप्पणी गर्दै सरकारको तयारीबारे प्रश्न राखेका थिए।
त्यस्तै नेकपाकी सांसद रामकुमारी झाँक्रीले पनि ‘नेपाल वायु सेवा निगमले म्यानेजमेन्ट खत्तम भएको, बिजनेश प्लान नै नभएको र गतव्यविहिन अवस्थामा पुगेको’ भन्दै सरकारको आलोचना गरिन्।
‘किस्ता पनि तिर्न सक्दैन भन्ने अवस्था आएको छ, सरकारले के सोचेको छु,’ झाँक्रीले प्रश्न गरिन्।
कांग्रेस सांसद दिव्यमणी राजभण्डारीले नेपाल वायु सेवा निगम धुजाधुजा भएको टिप्पणी गरे।
अर्थमन्त्री खतिवडाले नेपाल वायु सेवा निगमको चिन्ता सरकारलाई पनि भएको बताए। ‘लामो दुरीको अन्तराष्ट्रिय गन्तव्यमा नगई हुन्नु,’ खतिवडाले भने, ‘जापानमा ओसाका, टोकियो र चीनमा केही प्रक्रिया अगाडि बढेको छ। केही लामो दुरीका र मध्यम दुरीमा हवाइ सम्झौता अगाडि बढ्दैछन्।’
उनले राष्ट्रिय ध्वजावाहक लागि सरकार जमानी बसेको उल्लेख गर्दै केही समयसम्म ब्याज भुक्तानीका लागि रिसेड्युल गरि पुन: तालिकीकरण गरिएको जानकारी दिए। ‘बायु सेवा निगमलाई पूँजिकृत गर्ने र भोलि सम्भव हुन्छ भने केही ऋणका अरु अवसर खोजेर व्यवसायकि पार्टनरसीप खोजेर अगाडि बढ्नुपर्छु,’ खतिवडाले भने।
उनले युरोपियन युनियनको कालोसूचीबाट हट्नका लागि सरकारले नागरिक उड्ययन प्राधिकरणको जिम्मेवारी विभाजन गर्न लागेको बताए। उनले छुट्टाछुट्टै कानुन निर्माण गर्ने काम अन्तिम चरणमा पुगेको बताए।
खतिवडाले अन्तराष्ट्रिय विमानस्थल सञ्चालन गर्ने प्रधिकरण नेपाल ल्याएर विमानस्थलहरु सञ्चालनमा सहकार्य गर्ने सोच सरकारको रहेको बताए। उनले प्रदेशपिच्छे अन्तराष्ट्रिय विमासन्थल माग भएको विषयमा सरकारले अध्ययन गर्ने बताए। ‘एउटा प्रदेशमा तीन वटा अन्तराष्ट्रिय विमानस्थलको कुरा गरेका छौँ। कति नटिकल माइलमा एउटा अन्तराष्ट्रिय विमानस्थल र कतिमा आन्तरिक विमानस्थल राख्ने, तराई र पहाडमा के गर्ने, सबै प्रदेशमा जान सक्छौँ कि सक्दैनौ अध्ययन गर्छौँ,’ खतिवडाले भने।
उनले ५० वटा अन्तराष्ट्रिय उडान नहुने अन्तराष्ट्रिय विमानस्थल सम्भाव्य नहुने बताए।
हवाइ पूर्वाधारको रणनीति बनाउन सरकार लागि रहेको उल्लेख गर्दै उनले केही विमानस्थललाई दक्षिण एसियाली स्तरमा विकास गर्ने बताए। ’जिल्लापिच्छे एयरपोर्ट बनाउने कि व्यवसायिक सम्भावनाको आधारमा बढ्ने र प्राविधिक रुपमा अगाडि बढाइनेछु,’ खतिवडाले भने, ‘यही मापदण्डमामा रहेर विमानस्थलहरुको रनवे विस्तार, स्तरउन्नती गरिनेछ।’
