भुटान सरकारले शिक्षक र स्वास्थ्य सेवाका कर्मचारीलाई उही तहका अन्य कर्मचारीमध्ये सबैभन्दा धेरै तलब दिने भएको छ।
भुटानको मन्त्रिपरिषद् बैठकले गरेको तलब पुनरावलोकनअनुसार शिक्षक, डाक्टर, नर्स र मेडिकल क्षेत्रका कर्मचारीहरूको तलब अरू कर्मचारीको भन्दा धेरै हुनेछ।
भुटान सरकारको प्रधानमन्त्री कार्यालयले गरेको घोषणा अनुसार १० देखि २० वर्षको अनुभव भएका शिक्षकको तलब ३५ र २० वर्षभन्दा बढी अनुभव भएका शिक्षकको तलब ५५ प्रतिशतले बढेको छ।
यस्तै एमबिबिएस डाक्टरलाई उनीहरूको अनुभवका आधारमा ४५ देखि ६० प्रतिशतसम्म तलब बढाउने घोषणा सरकारले गरेको छ।
यस्तै नर्स र स्वास्थ्यक्षेत्रका अरू कर्मचारीको पनि अनुभवका आधारमा तलब बढाइएको छ।
घोषणाअनुसार १० वर्षसम्म सेवा गरेका नर्स तथा मेडिकल स्टाफको ३५, १० वर्षदेखि २० वर्षसम्म अनुभव हुनेहरूको ४५ र २० वर्षभन्दा धेरै अनुभव भएका स्वास्थ्य कर्मचारीहरुको तलब ५५ प्रतिशतसम्म तलब बढेको छ।
सरकारको यो घोषणाले भुटानका आठ हजार ६ सय ७९ शिक्षक र करिब ४ हजार स्वास्थ्य कर्मचारी लाभाविन्त हुने द भुटनिज अनलाइनले उल्लेख गरेको छ।
प्रधानमन्त्री लोटे छिरिङले सरकारको अहिलेको प्राथमिकता शिक्षा र स्वास्थ्य भएकाले उनीहरूलाई प्रोत्साहन गर्न तलब बढाउने निर्णय गरिएको बताएका छन्।
