स्ट्रेइट अफ होर्मुजको अन्तर्राष्ट्रिय आकाशमा रहेको अमेरिकी सेनाको एउटा ड्रोनलाई इरानले जमिनबाट क्षेप्यास्त्र प्रहार गरेर खसालिदिएको छ।अमेरिका र इरानबीच तनाव बढिरहँदा यो घटना भएको हो।
इरानको इस्लामिक रिभोलुसन गार्डस् कोरका अनुसार बिहीबार सबेरै उक्त जासुसी ड्रोन इरानी आकाशभित्र पाइएकोले त्यसलाई खसालिएको हो।
त्यसका कमान्डर मेजर जनरल हुसैन सलामीले उक्त घटनाले ‘अमेरिकालाई स्पष्ट सन्देश दिएको’ बताएको सञ्चारमाध्यमहरूले उल्लेख गरेका छन्।
इरानको सर्वोच्च राष्ट्रिय सुरक्षा परिषदका सचिवले बुधबार तेहरानले आफ्नो आकाशमा बिनाअनुमति उडान हुन नदिने बताएका थिए।
‘हाम्रो आकाश हाम्रो रेड लाइन हो र इरानले त्यसको उल्लङ्घन गर्ने जुनसुकै देशलाई जवाफ दिनेगरेको छ,’ ती सचिवलाई उद्धृत गर्दै सञ्चारमाध्यम भन्छन्।
सोमबार अमेरिकी रक्षा मन्त्रालयले इरानी सुरक्षाबलले ‘उत्तेजक व्यवहार’ देखाएको भन्दै थप एक हजार अमेरिकी सेना त्यसतर्फ खटाउने बताएको थियो।
उक्त नयाँ तैनाथी गत महिना नै १५ सय सेना खटाउने राष्ट्रपति डोनाल्ड ट्रम्पको घोषणामा थपिएको हो।
अमेरिकाले इरानलाई गल्फ अफ ओमानमा दुई वटा पेट्रोलियम तेल ट्याङ्करमाथि हमला गरेको आरोप लगाएको छ।
अमेरिकी सेनाले केही नयाँ तस्बिरहरू सार्वजनिक गर्दै गत साता पेट्रोलियम पद्धार्थ बोकेका दुई पानीजहाजमा भएका हमलामा इरान जोडिएको देखिएको बताएको छ।
इरानले भने उक्त आरोपलाई अस्वीकार गर्दै आएको छ।
तेहरानले सन् २०१५ को परमाणु सम्झौताका अनुमति दिएको तीन सय किलोग्रामभन्दा बढि ‘लो इनरिच्ड युरेनियम’ दुई साताभित्र भण्डारण गर्ने बताएपछि तनाव चुलिएको थियो ।
इरानको परमाणु महत्त्वाकांक्षालाई सीमित पारिएको सन् २०१५ को उक्त सम्झौताबाट अमेरिका एक वर्षअघि पछि हटेको थियो।
यसअघि रुस र चीनले दुवै पक्षलाई विवेक र संयमता प्रयोग गर्न आग्रह गरेका थिए।
रुसी सहायक विदेशमन्त्री सर्गेई रियाबकफले अमेरिकाले जानाजान इरानलाई युद्धका लागि उक्साउने काम बन्द गर्नुपर्ने बताएका थिए।
चिनियाँ विदेश मन्त्री वाङ् यीको चेतावनी चाहिँ इरानमाथि थोपरिएको चर्को दबाबले पूरै मध्यपूर्वमा सम्हाल्न नसकिने खतरा उत्पन्न हुन सक्ने भन्ने थियो।
