सञ्चार तथा सूचना प्रविधिमन्त्री गोकुलप्रसाद बाँस्कोटाले नेपालको मिडियालाई सबैभन्दा सुरक्षित गर्ने ऐन ल्याउन लागिएको बताएका छन् ।
नेपाल आदिवासी जनजाति पत्रकार महासङ्घ ३ नम्बर प्रदेश भेलाको आज धुन्चेमा उद्घाटन गर्दै मन्त्री बाँस्कोटाले प्रेस जगत समाजको दर्पण भएका कारण सत्य तथ्य समाचार सङ्कलन गर्न आग्रह गरे।
सो क्रममा उनले कुनै पनि कानून बनाउँदा अरुलाई सोधेर मस्यौदा बनाउने नभइ सरकार आफैँले बनाइ विधेयक संसदमा पेश गर्ने प्रक्रिया रहेको स्पष्ट पारे। मन्त्री बाँस्कोटाले सामाजिक, आर्थिक संस्कृतिसमेत समग्र विषयवस्तुलाई समेटि समृद्ध नेपाल बनाउन वर्तमान सरकार अगाडि बढिरहेको बताए।
उनले रसुवा जिल्लाको पवित्र तीर्थस्थल गोसाइँकुण्ड, पर्यटकीय क्षेत्र लाङटाङ र नेपालको उत्तरी नाका रसुवागढी यही जिल्लामा रहेकाले आउँदै गरेको पर्यटन वर्षलाई सफल पार्न एकताबद्ध तवरले अगाडि बढ्न रसुवालीलाई आग्रह गरे ।
यस्तै गोसाइँकुण्ड गाउँपालिकाले स्याफ्रुबेसीमा आयोजना गरेको गाउँपालिकास्तरीय प्रथम अन्तर विद्यालय राष्ट्रपति रनिङ शिल्ड प्रतियोगिताकोसमेत मन्त्री बाँस्कोटाले शनिबार नै उद्घाटन गरे।
सो अवसरमा मन्त्री बाँस्कोटाले खेल जगतले शारीरिक स्वस्थ्यता कायम गर्नुका साथै अन्तर्राष्ट्रियस्तरमा नेपालको छवि उच्च राख्ने भएकाले अनुशासित तवरबाट अगाडि बढ्न खेलाडीलाई आग्रह गरे। उनले दुई वटा विद्यालयलाई पहिलो चरणमा इन्टरनेट सुविधा दिने घोषणा गर्दै प्रस्ताव पेश गर्न आग्रह भयो ।
त्यसैगरी मन्त्री बाँस्कोटाले ऐतिहासिक रसुवागढीको निरक्षण गरी, रसुवागढी भन्सार कार्यालयको गतिविधि बारे अवलोकन पनि अवलोकन गरे।
