उत्तर कोरियाली शासक किम जोङ उन र रूसका राष्ट्रपति भ्लादिमिर पुटिनबीच पहिलोपटक भेट भएको छ।
रूसको सुदुर पूर्वमा पर्ने भ्लादिभोस्तोक शहर नजिकैको रस्की आइसल्याण्डमा भएको भेटमा दुवैले एकअर्कासँग हात मिलाउँदै सम्बन्धलाई अझै गाढा बनाउने बताएका छन्।
अमेरिकी राष्ट्रपतिसँग उनको सम्बन्ध चिसिएपछि भएको पुटिनसँग भेटलाई महत्वका साथ हेरिएको छ। परमाणुका विषयमा अमेरिकाले वेवास्ता गरेपछि किमले रूससँग सहयोगको अपेक्षा राखेका छन्।
भेटका क्रममा उन र पुटिनले दुई देशबीचको लामो ऐतिहासिक सम्बन्धका बारेमा कुरा गरेको अन्तर्राष्ट्रिय समाचार माध्यामहरूले बताएका छन्।
भेटमा पुटिनले कोरियन प्रायद्वीपको समस्या समाधानमा सहयोग गर्न आफू इच्छुक रहेको बताएका छन्।
'तपाईंसँगको भेटले हामी एक अर्कालाई बुझ्न मद्दत पुग्ने छ भन्ने विश्वास लिएको छु। कोरियन प्रायद्वीपमा भएको समस्या समाधानमा रूसले सहयोग गर्न सकारात्मक भुमिका खेल्नेछ,' पुटिनलाई उदृत गर्दै अन्तराष्ट्रिय समाचार माध्यमले बताएका छन्।
उनले पनि रूससँगको सम्बन्ध अझै गाढा हुनेमा आफू विश्वस्त रहेको बताए।
'हामीबीच लामो मैत्री सम्बन्धको इतिहास छ। दुईदेश बीचमा विकास भएको सम्बन्धलाई यो भेटले उपयोगी सावित गर्नेमा म आशावादी छु,' किमले भनेका छन्।
किम एकदिन अघि नै आफ्नो हरियो रेलमा चढेर भ्लादिभोस्तोक पुगेका थिए।