प्रधानमन्त्री केपी शर्मा ओलीको जिल्लामा मात्र विकासका आयोजना गएको सांसदहरूले आरोप लगाएका छन्।
संसदको विकास तथा प्रविधि समितिको मंगलबारको बैठकमा सांसद टोप बहादुर रायमाझीले ठूला आयोजनाका बजेट झापा, रुपन्देही, चितवन र दाङमा धेरै गएको आरोप लगाएका हुन्।
‘पद र पहुँचको आधारमा आयोजना राखेर अरू क्षेत्र शून्य हुने हो भने जनताको आशा र विश्वास आक्रोशमा बदलिने सम्भावना छ,’ सांसद रायमाझीले भने।
‘यो वर्ष ज्यादै दुखदायी भयो। निर्वाचन क्षेत्रमा जानै नसकिने भएको छ। कार्यकर्ता र जनताको गुनासो धेरै छन्। पुराना आयोजनाका अलपत्र छन्। खानेपानीमा आक्रोश छ। विद्यालयको भवनको हालत त्यस्तै छन्। विकास निर्माणका काम ठप्प छन्। बहुवर्षीय ठेक्काका काम जसरी हुन्थ्यो। त्यो ठप्प छ,’ उनले भने, ‘कतिपय जिल्लामा काम पनि भएका छन्। तर सीमित जिल्लामा मात्र भएका छन्। केही काम गर्नुपर्यो भनेर कुनै विभागमा गएमा फाइल नै प्रवेश हुँदैन।’
सांसद आशा कुमारी विकले सीमित मान्छे र नेताको काम मात्र पास हुने भन्दै जनता निराश हुन थालेको बताइन्।
‘विकास असन्तुलनले देशमा कसरी विकास र समृद्धि हुन्छ भनेर प्रश्न उठेको छ। पहुँच नभएको सांसदका जिल्लामा कहिले काम हुन्छ?, यो प्रक्रियाले सुखी नेपाली समृद्ध नेपाल कसरी बन्छ? अब आउने बजेटमा आवश्यकतालाई हेरियोस्,’ उनले भनिन्।
सांसद बहादुर सिंह लामाले अहिले आउन लागेको बजेटको आंकडाअनुसार पहिला झापा अनि रुपन्देही हुँदै बजेट गएको वास्तविकता हो भने समग्र विकासका लागि जोड दिन आग्रह गरे।
यस्तै, बैठकमा सांसदहरूले बहुवर्षीय आयोजनाहरू साथै सडक, पुलको मापदण्ड तथा ठेक्का लगाइएका र निर्धारित समयमा सम्पन्न हुन नसकेका आयोजनाबारे कुरा उठाएका थिए।