नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ले सरकारले चैतभित्र पार्टीमाथिको प्रतिबन्ध नहटाए सरकारविरूद्ध प्रतिबन्ध र आमहडताल गर्ने चेतावनी दिएका छन्।
नेताहरू धमाधम पक्राउ पर्न थालेपछि चन्दले सोमबार एक विज्ञप्ति जारी गरी प्रतिबन्ध नहटाइए सरकारविरूद्ध संघर्ष गर्ने चेतावनी दिएका छन्। विज्ञप्तिमा स्थायी समिति सदस्य हेमन्तप्रकाश ओलीसहित नेता कार्यकर्ता पक्राउविरूद्ध चैत १६ गते नेपाल बन्द गर्ने घोषणा गरिएको छ।
विज्ञप्तिमा चैत २४ गतेसम्म विभिन्न कार्यक्रम गर्ने उल्लेख छ। १३ गते देशभर चोक जुलुस, १४ गते देशभर कोणसभा, १५ गते मसाल जुलुस, १६ गते बन्द, १९ गते अन्तरक्रिया, २१ गते जनवर्गीय संगठनको बिरोध प्रदर्शन, चैत २२ र २३ गते कालो झन्डा प्रदर्शन र २४ गते देशव्यापी जनसभा र जनप्रदर्शन गर्ने कार्यक्रम सार्वजनिक गरिएको छ।
विज्ञप्तिमा आफ्नो असफलता, बदनामी र सङ्कटलाई छोप्न सरकारले अशान्ति मच्चाएको, चन्दा उठाएको हवाला दिँदै नेपाली आफ्नो पार्टीमाथि प्रतिबन्ध घोषणा गरेको चन्दले बताएका छन्।
‘प्रतिबन्ध र दमन हटाउनुको सट्टा चर्काएर सरकारले वस्तुतः देशलाई गृहयुद्ध र द्वन्द्वतिर धकेल्न खोजेको छ,’ विज्ञप्तिमा भनिएको छ।