राष्ट्रिय जनता पार्टीका नेता महन्थ ठाकुरले अहिले पनि मुलुक यथास्थितिमा नै चलिरहेको आरोप लगाएका छन्।
संघीय संसदको तेस्रो अधिवेशन अन्त्यको अवसरमा आइतबार प्रतिनिधिसभामा बोल्दै राजपाका नेता महन्थ ठाकुरले यथास्थितिलाई नै लाद्ने काम भएको टिप्पणी गरेका हुन्।
संविधान बनाउने समयमा पहिचानको आधारमा संघ हुनुपर्छ भनेर भनिए पनि सो अनुसार संघ नबनेको नेताहरूले नै स्वीकार गरेको भन्दै उनले परिवर्तनको महशुस अझै पनि जनताले गर्न नसकेको बताए।
राज्यको आतंक अहिले पनि जारी रहेको भन्दै उनले लोकतन्त्रमा आफ्नो अधिकारको खोजी गर्दा राज्यले आफ्ना सांसदहरूलाई जन्मकैदको सजाय सुनाएको गुनासो गरे।
उनले भने,‘लोकतन्त्रमा आफ्नो अधिकार माग्दा जेल जानुपर्ने ? आफ्नो अधिकारको माग कहिले गर्ने ? कुन व्यवस्थामा गर्ने ?’
अहिले पनि राज्यआतंक जारी रहेको टिप्पणी उनले गरे।
उनले भने, ‘सरकारले आतंक मच्चाउँदा इनाम पाउने, प्रसंमा पाउने, तक्मा पाउने र जनताले आफ्नो अधिकार माग्दा गोली खानुपर्ने, जेल जानुपर्ने, मर्नुपर्ने ?’
अहिले पनि अधिकार केन्द्रित भएको र संघीय संरचना कागजमा मात्रै सीमित भएको दाबी गरे।
एउटा समूह र व्यक्तिमा सम्पूर्ण शक्ति केन्द्रीतकृत हुँदा अधिनायवाद शैलीमा मुलुक जाने भन्दै उनले त्यो लक्षण नेपालको राजनीतिमा पनि देखिएको तर्क गरे।
