केन्द्रीय सदस्य स्वत: महाधिवेशन प्रतिनिधि हुने व्यवस्था बहुमतका आधारमा पार्टी विधानमा राखिएकोमा असन्तुष्टि जनाएका कांग्रेस जिल्ला सभापतिले भेला बोलाएका छन्।
पुसमा सकिएको महासमिति बैठकको म्यान्डेट विपरीत पार्टी चलेको भन्दै अब कसरी अघि बढ्ने भन्नेबारे छलफल गर्न कांग्रेस असन्तुष्ट पक्षले भेला बोलाएको हो।
बरिष्ठ नेता रामचन्द्र पौडेल समूहका जिल्ला सभापतिले मंगलबार काठमाडौंमा बैठक गरी चैत तेस्रो साता जिल्ला सभापति भेला राख्ने निर्णय गरेका हुन्। भेला कति गते र कहाँ हुने भन्नेबारे पछि तय गर्ने कांग्रेस नुवाकोट सभापति जगदीश्वरनरसिंह केसीले जानकारी दिए।
काठमाडौं वा सिन्धुपाल्चोक एक जिल्लामा भेला गर्ने तयारी रहेको उनको भनाइ छ। महासमिति बैठकका निर्णय केन्द्रीय समितिले उल्टाउन नसक्ने भन्दै कांग्रेस जिल्ला सभापतिहरु नेतृत्वसँग रुष्ट छन्।
उनीहरुले केन्द्रीय सदस्य पनि चुनाव लडेर जितेपछि मात्रै महाधिवेशन प्रतिनिधि हुने व्यवस्था विधानमा राख्न र समानुपातिक कोटा एकै व्यक्तिले पटकपटक लिन नपाउने व्यवस्था राख्न माग गरेका थिए।
महासमिति बैठक हुनुपूर्व पनि नुवाकोटमा कांग्रेस जिल्ला सभापतिको भेला भएको थियो। उक्त भेलाबाट महाधिवेशन प्रतिनिधि हुन चुनाव लड्नुपर्ने व्यवस्था राख्न नेतृत्वलाई दबाब दिने निर्णय उनीहरुले गरे पनि विधानमा त्यो व्यवस्था नराखेपछि जिल्ला सभापति रुष्ट छन्।