हाम्रोमा कम्युनिष्टका नेताका पछि कमरेड र कांग्रेसका नेताका पछि दाइ जोडेर सम्बोधन गर्ने चलन छ। पार्टीबाहिरका मान्छेले उनीहरूलाई सम्बोधन गर्दा पदअनुसार सभापति, अध्यक्ष, माननीयजस्ता पदका पछि ज्यू थप्ने गरिन्छ।
भारतमा अहिले एउटा यस्तै विषयको भिडियो चर्चामा छ। प्रमुख प्रतिपक्षी भारतीय कंग्रेसका अध्यक्ष राहुल गान्धी पनि चुनावी प्रचारका क्रममा देश दौडाहामा छन्।
आउने महिनादेखि सुरू हुने लोकसभा चुनावका लागि दलहरू अन्तिम चुनावी प्रचारमा जुटेका छन्।
९० करोड बढी मतदाता भएको भारतमा मतदातालाई आफूतर्फ आकर्षित गर्न निकै चुनौतीपूर्ण छ। राहुल पहिलो पटक मतदानमा सहभागी हुन लागेका यूवालाई लक्षित गरी चुनावी प्रचार गरिरहेका छन्। त्यसका लागि उनले यूवाहरूलाई आफसँग घुलमिल हुने खालका व्यवहार गरिरहेका छन्।
बिहीबार चेन्नई पुगेका राहुलको स्टेला म्यारिस कलेजका विद्यार्थीसँगको अन्तरक्रियाको एउटा भिडियो क्लिपमा कंग्रेस (आई)ले आफ्नो फेसबुक पेजमा राखेको छ। उक्त भिडियोमा राहुल आफूलाई प्रश्न गर्न लागेकी एक छात्रालाई बिचैमा रोकेर भन्छन्- मलाई सर नभन्नुस्, राहुल भन्नुस्।
राहुलको यो प्रतिक्रियाले सुरूमा ती छात्रा अलमलिन्छिन्। लजाउँछिन। अनि फेरि राहुल सम्बोधन गरेर प्रश्न सुरू गर्छिन्। प्रश्नको बीचमा पनि उनी रोकिएर राहुल भन्छिन्।
