केक काट्दै प्रधानमन्त्रीले भने- सुरक्षा परिषद्लाई ह्यापी बर्थडे (फोटो फिचर)

सेतोपाटी संवाददाता

काठमाडौं, फागुन २७

राष्ट्रिय सुरक्षा परिषद् सचिवालयले आफ्नो १८ औं वार्षिकोत्सव मनाएको छ।

सो अवसरमा प्रधानमन्त्री केपी शर्मा ओलीले सुरक्षा परिषद्लाई शुभकामना दिए।

राष्ट्रिय सुरक्षा परिषद्को १८ औं वार्षिक उत्सव अथवा सुरक्षा परिषद् आफ्ना १८ वर्ष पूरा गरेर १९ वर्षमा प्रवेश गर्दैछ भन्दै प्रधानमन्त्री केपी शर्मा ओलीले ‘सुरक्षा परिषद्लाई ह्याप्पी बर्थडे’ भने।

कार्यक्रममा बोल्दै प्रधानमन्त्री केपी शर्मा ओलीले सिके राउतसँग गरिएको सहमतिमा जनमत संग्रहबारे कहिँकतै उल्लेख नगरिएको स्पष्ट पारे।

प्रधानमन्त्री ओलीले मुलुकको भौगोलिक अखण्डता, राष्ट्रिय स्वाधिनता र जनताको सार्वभौमसत्तामाथि जनमत संग्रह हुनै नसक्ने पनि स्पष्ट पारे।

उनले राष्ट्रिय एकता र लोकतन्त्रको पक्षमा जनताले चाहेमात्रै जनमत संग्रह हुन सक्ने पनि उल्लेख गरे।

प्रधानमन्त्री ओलीले राष्ट्रिय स्वाधिनता, भौगोलिक अखण्डताको विषयलाई प्रश्न उठाउने अधिकार कसैलाई नभएको पनि स्मरण गराए।

राष्ट्रिय सुरक्षा परिषदका अध्यक्ष समेत रहेका उनले पृथकतावादी आन्दोलन गरिरहेको राउत समूहले मुलुकको भौगोलिक अखण्डताको सम्मान गर्दै मूल धारको राजनीतिमा आएको उल्लेख गर्दै प्रधानमन्त्री ओलीले मुलुकको सुरक्षाका दृष्टिले त्यो सहमति अत्यन्तै महत्वपूर्ण उपलब्धि भएको पनि बताए।

सो अवसरमा प्रधानमन्त्री केपी शर्मा ओली, रक्षामन्त्री ईश्वर पोखरेल, परराष्ट्र मन्त्री प्रदीप ज्ञवाली अर्थमन्त्री युवराज खतिवडा, प्रधानसेनापति पूर्णचन्द्र थापासहित सबै सुरक्षा अंगका प्रमुखहरूको सहभागिता रहेको थियो।

हेर्नुस् सेतोपाटीका लागि निशा भण्डारीले खिचेका तस्बिरहरू: