विवेकशील साझा पार्टीले शुक्रबार देशका विभिन्न स्थानमा भएको बम विस्फोटको घटनाबारे भर्त्सना गरेको छ।
‘द्वन्द्वोत्तर मुलुकको कष्टकर घाउमा राम्रोसँग खाटा बस्न पनि पाएको छैन। यहि परिवेशमा भर्खरै देशका विभिन्न भागमा हिंसात्मक विस्फोटका घटनाहरुले हामीलाई पुनः त्यही नमिठो स्मरणले झस्काएको छ,’ शनिबार विवेकशीलले जारी गरेको विज्ञप्तिमा भनिएको छ,‘भीषण द्वन्द्वबाट गुज्रिएको मुलुकमा फेरि यस्ता हिंसात्मक घटनाहरु घटित हुन थाल्नु मुलुकको संविधान, विधिको शासन तथा सम्पूर्ण लोकतान्त्रिक प्रक्रिया माथिकै चुनौती, चिन्ता र आपत्तिको विषय हो।’
पार्टीले हिंसा त्यागेर लोकतान्त्रिक विधि र प्रक्रिया आउन सम्बन्धितलाई आग्रह गरेको छ।
साथै, पार्टीले नख्खु बम विस्फोट परी घाइते भएका नागरिकहरूको शिघ्र स्वास्थ्योपचार गर्न र क्षति भएका नागरिकहरूका हकमा क्षतिपूर्तिको व्यवस्था गर्न समेत सरकारसँग माग गरेको छ।
पार्टीले दोषी पत्ता लगाएर यथाशिघ्र उनीहरूमाथि कानुनी कारबाहीको समेत माग गरेको छ।
