विवेकशील नेपाली दलले शुक्रबार साँझ काठमाडौंलगायत देशका विभिन्न स्थानमा भएका बम विस्फोट लगायतका हिंसात्मक घटनाहरूप्रति सरकारको गम्भीर ध्यानाकर्षण गराएको छ।
दलले विस्फोटको घटनामा संग्लनहरूको यथाशक्य छिटो पहिचान गरी कानुनी कारबाही अघि बढाउन पनि सरकारसँग माग गरेको छ।
यसका साथै दलले ललितपुरको नख्खुस्थित एनसेल प्रालिको गेटमा भएको विस्फोटमा परी उपचारको क्रममा मृत्यु भएका व्यक्तिको परिवारलाई उचित क्षतिपूर्ति र अन्य घाइतेहरूको निःशुल्क उपचारको व्यवस्था मिलाउन समेत सरकारसँग आग्रह गरेको छ।
ललितपुरको नख्खुस्थित एनसेल मुख्यालय गेट अगाडि शुक्रबार साँझ भएको बम विस्फोटमा परी तीन जना घाइते भएकोमा लम्जुङका ४९ वर्षीय सिंहप्रसाद गुरुङको मृत्यु भएको छ।
घाइते भएका ललितपुर ४ बागडोल बस्ने २६ को प्रतिक्षा खड्का र काभ्रेको बनेपा घर भई मेडिसिटी अस्पतालमा स्टाफ नर्सको रूपमा कार्यरत २५ वर्षीया उरुशा मानन्धरको उपचार भइरहेको छ।
आफ्ना मागहरू शान्तिपूर्ण तवरबाट अघि सार्न सम्बन्धित सबैलाई दलले आग्रह गरेको छ।
यस्ता घटनाहरूले त्रासको वातावरण सिर्जना गर्ने र लगानीकर्ताको लगानीको सुरक्षामा समेत शंका पैदा गर्ने हुँदा, सरकार र सरोकारवालाहरू अत्यन्तै गम्भीर रहेको बताउँदै दलले सरकारसँग शान्ति सुरक्षाको व्यवस्था मिलाउन तथा घटना नदोहोरिने प्रत्याभूति दिलाउन आग्रह गरेको छ।
